Alban – dau Ddem Rhydd amlwg yn dweud Ie

John Barrett yn ei ddyddiau yn aelod seneddol (John Barrett CCA 1.0)
Mae dau gyn aelod amlwg o’r Democratiaid Rhyddfrydol yn yr Alban wedi datgan eu cefnogaeth i bleidlais Ie yn y refferendwm annibyniaeth.

Fe fydd penderfyniad cyn AS Gorllewin Caeredin, John Barrett, a Dr Michael Foxley, cyn arweinydd Cyngor yr Ucheldiroedd – sydd wedi gweithio gyda Danny Alexander, Prif Ysgrifennydd y Trysorlys – yn cael ei ystyried yn hwb i Alex Salmond a’r SNP.

Dywedodd John Barrett ei fod wedi bod yn ansicr sut y dylai bleidleisio yn y refferendwm ond ei fod wedi dod i benderfyniad bellach.

Mae o’r farn y bydd aelodau eraill o’r Democratiaid Rhyddfrydol yn rhannu ei olwg ar bethau.

‘Gorau, gwell’

“Mae’r Democratiaid Rhyddfrydol wastad wedi cymryd y lein ein bod yn cefnogi Teyrnas Unedig ffederal, ond nid dyna sydd ar y papur pleidleisio,” meddai John Barrett.

“Penderfynodd yr arweinyddiaeth ymuno gyda Gwell Gyda’n Gilydd [yr ymgyrch Na]. Ond dw i wedi penderfynu mai’r opsiwn gorau, gwell, nesaf yw pleidleisio Ie ar 18 Fedi.

Ac yntau’n gyn feddyg, roedd Michael Foxley’n dweud ei fod yn seilio’i benderfyniad ar y profiad hwnnw.“Dw i wedi gweithio yn y Gwasanaeth Iechyd ers dros 40 mlynedd ac dw i wedi fy argyhoeddi, bod siawns well o sicrhau fod y gwasanaeth yn gryf, gwydn ac yn darparu gofal am ddim mewn Alban annibynnol.”