Mae canolfan frechu yng Nghaerdydd wedi gohirio brechiadau tan yfory, dydd Iau, ar ôl i staff yno brofi’n bositif am Covid-19 ychydig ddyddiau wedi i’r ganolfan agor.
Er nad yw Bwrdd Iechyd Prifysgol Caerdydd a’r Fro wedi cadarnhau pa ganolfan effeithiwyd arni, mae adroddiadau bod naw aelod o staff wedi profi’n bositif mewn canolfan frechu yn ardal Sblot.
Mae gofyn i unrhyw un a nodwyd fel cyswllt agos hunanynysu.
“Gallwn gadarnhau bod nifer o staff wedi profi’n bositif yn un o’n Canolfannau Brechu Torfol,” meddai’r bwrdd iechyd.
“Rydym yn profi staff yn y ganolfan a gofynnir i unrhyw un a nodir fel cyswllt agos hunanynysu.
“Ar hyn o bryd, does dim risg ychwanegol wedi’i nodi i unrhyw un sydd wedi cael ei frechu yn y ganolfan.”
Mae 6,000 o achosion wedi’u cadarnhau ym Mwrdd Iechyd Prifysgol Caerdydd a’r Fro a ydd safleoedd profion lleol ychwanegol yn agor yng Nghaerdydd ddiwedd yr wythnos.
‘Staff yn cael eu gwthio i’r eithaf.”
Dywedodd arweinydd Cyngor Dinas Caerdydd, Huw Thomas y dylai trigolion archebu prawf os ydyn nhw’n teimlo’n sâl neu’n arddangos unrhyw un o’r symptomau o’r feirws.
“Rwyf am fod yn glir bod digon o gapasiti yn y system, ac ni fu erioed yn haws cael prawf,” meddai.
“Mae’r cynnydd yn y niferoedd yn llwm. Os na fyddwn yn dilyn y rheolau, gallai ein Gwasanaeth Iechyd a’n gwasanaethau fod dan straen sylweddol erbyn y Nadolig.
“Mae adnoddau ysbytai yn cael eu hymestyn a staff yn cael eu gwthio i’r eithaf.”
Ychwanegodd fod 278 o staff meddygol a nyrsio yn y brifddinas methu gweithio ar hyn o bryd am eu bod yn hunanynysu.
