Mae’r Prif Weinidog Boris Johnson wedi derbyn dyfarniad llys am ddyled o £535 sydd heb gael ei thalu.
Mae chwiliad o gronfa ddata dyfarniadau’r llys sirol yn dangos y dyfarniad am y ddyled a gofrestrwyd i Boris Johnson yn “Rhif 10 Stryd Downing”.
Dyddiad y dyfarniad, a ddatgelwyd gyntaf gan gylchgrawn Private Eye, yw 26 Hydref y llynedd.
Nid yw’r cofnodion llys swyddogol yn nodi pwy yw’r credydwyr, na natur y ddyled.
Boris v. the bailiffs? A county court judgement for unpaid debt was issued last October against one Boris Johnson, address 10 Downing Street – and six months on, it STILL hasn’t been paid. An exclusive in the new Private Eye, on sale today.
— Private Eye Magazine (@PrivateEyeNews) May 12, 2021
Beilïaid i Rhif 10?
Mae gwefan y Llywodraeth yn rhybuddio y gellir anfon beilïaid os nad yw dyledion yn cael eu talu.
Gall banciau a chwmnïau benthyciadau hefyd ddefnyddio’r wybodaeth i benderfynu a ddylid rhoi credyd neu fenthyciadau.
“Os ydych chi’n hwyr gyda’ch taliadau, gallech gael eich gorchymyn i ddychwelyd i’r llys ac efallai y bydd yn rhaid i chi dalu costau ychwanegol,” ychwanega’r wefan.
Mae’r dyfarniad yn golygu bod y llys wedi penderfynu’n ffurfiol bod yr arian yn ddyledus, yn ôl safle’r Llywodraeth.
Nid yw rhif 10 wedi ymateb eto i gais am sylwadau hyd yma.
Rhoddion
Daw hyn wrth i’r Prif Weinidog wynebu nifer o gwestiynau wrth i’r Comisiwn Etholiadol ymchwilio i weld a gafodd unrhyw rodd ei ddatgan yn gywir.
Mae Boris Johnson wedi gwadu ei fod wedi gwneud unrhyw beth o’i le ac wedi mynnu ei fod yn bersonol yn talu am y gwaith adnewyddu.
Fodd bynnag, mae wedi gwrthod dweud a gafodd fenthyciad cychwynnol ar gyfer y gwaith.
Mae prif weinidogion yn cael cyllideb o hyd at £30,000 y flwyddyn i adnewyddu eu fflat yn Stryd Downing, ond mae adroddiadau papur newydd wedi awgrymu bod costau Boris Johnson wedi cynyddu.
Dywedodd yr arglwydd Torïaidd, yr Arglwydd Brownlow, mewn e-bost a ddatgelwyd i’r Daily Mail ei fod yn rhoi rhodd o £58,000 i’r Ceidwadwyr “i dalu am y taliadau y mae’r blaid eisoes wedi’u gwneud ar ran yr ‘Ymddiriedolaeth Stryd Downing’ a fydd yn cael ei ffurfio’n fuan”.
Mae Boris Johnson Johnson hefyd yn cael ei archwilio gan gorff gwarchod “sleaze” Tŷ’r Cyffredin dros ei wyliau dadleuol ar ynys breifat Mustique dros y flwyddyn newydd.
Mae’r Comisiynydd Safonau Seneddol, Kathryn Stone, yn ymchwilio a gafodd y gwyliau £15,000 ei ddatgan yn gywir.
“Diwrnod arall, adroddiad arall o anghysondebau”
Dywedodd y Dirprwy Arweinydd Llafur Angela Rayner: “Diwrnod arall, adroddiad arall o anghysondebau pryderus iawn am adnewyddu fflat Boris Johnson.
“Nid yw hyn yn ymwneud â chyllid personol Boris Johnson, mae’r cofnod yn siarad drosto’i hun ei fod eisoes wedi torri’r rheolau ar ddatgan ei fuddiannau ariannol, ac mae eisoes yn destun ymchwiliad ynglŷn â chamweddau a allai fod yn anghyfreithlon.
“Y peth ydi gyda’r ddyled o ran y Prif Weinidog yw pa ddyled o ddiolchgarwch sydd arno Boris Johnson i’r rhoddwr Torïaidd a dalodd i adnewyddu ei fflat, a beth gafodd ei addo, neu beth mae’r rhoddwr neu roddwyr yn ei ddisgwyl yn ôl am eu haelioni.”
