Dynes 98 oed yn hel lladron o’i chartref yn Wrecsam

Fe wnaeth dynes 98 oed herio tri pherson oedd yn trio lladrata o’i thŷ yn Wrecsam, meddai Heddlu Gogledd Cymru.

Dywedodd yr heddlu bod tri pherson wedi mynd mewn i dŷ yn Camberley Drive, Wrecsam nos Fercher (15 Medi).

Fe wnaethon nhw lanast “gan daflu dodrefn o gwmpas er mwyn dod o hyd i eitemau gwerthfawr” cyn i’r ddynes 98 oed oedd yn byw yno glywed sŵn a’u herio nhw.

Gadawodd y tri yn waglaw.

Dywedodd yr Arolygydd Luke Hughes “na chafodd y ddynes ei hanafu yn y digwyddiad hwn, ond ei bod mewn sioc”.

Ychwanegodd y bydd hi, “heb amheuaeth”, wedi’i heffeithio gan y lladrad.

Mae’r heddlu’n apelio am wybodaeth am y tri – dynion, maen nhw’n credu – neu’n apelio ar unrhyw un sydd â fideo teledu cylch cyfyng (CCTV) o’r ardal tua 11:30pm nos Fercher i gysylltu â nhw.