Cynnydd o 30% mewn troseddau cyffuriau yn ystod y clo

Mae cynnydd o 30% wedi bod mewn troseddau cyffuriau yn ystod y clo, a hynny er bod y mwyafrif o droseddau eraill wedi gostwng.

Yn ôl y Swyddfa Ystadegau Gwladol cododd troseddau cyffuriau yng Nghymru a Lloegr o 44,064 rhwng mis Ebrill a mis Mehefin 2019 i 57,132 yn ystod yr un cyfnod eleni.

Fodd bynnag mae cyfanswm nifer y troseddau a gofnodwyd gan yr heddlu yng Nghymru a Lloegr wedi gostwng 4% eleni.

Dywedodd llefarydd ar ran y Swyddfa Ystadegau Gwladol mai’r cyfyngiadau a gafodd eu rhoi mewn lle i fynd i’r afael a’r coronafeirws sydd wedi arwain at y gostyngiad.

“Gwelwyd y gostyngiadau mwyaf sylweddol mewn troseddau dwyn a lladrata yn ystod y chwarter rhwng mis Ebrill a mis Mehefin.

“Er hyn mae’n edrych yn debyg bod lefelau troseddu ym mis Mehefin yn symud yn ôl tuag at lefelau cyn y clo.”

Ychwanegodd fod cynnydd hefyd wedi bod mewn ymddygiad gwrthgymdeithasol o ganlyniad i achosion o dorri cyfyngiadau’r coronafeirws.

Dyma nifer y dirwyon coronafeirws sydd wedi’u rhoi gan heddluoedd yng Nghymru:

Heddlu Trafnidiaeth Prydain 24

Heddlu Dyfed-Powys 1,735

Heddlu Gwent 138

Heddlu’r Gogledd 533

Heddlu’r De 342