Llanc 17 oed gafodd ei daro gan gar yn marw

Mae llanc 17 oed, a gafodd ei daro gan gar ger Wrecsam yn gynnar ddoe, wedi marw.

Roedd y cerddwr mewn gwrthdrawiad â Volkswagen Polo gwyn ar Heol yr Wyddgrug yng Ngwersyllt am 12.37yb ar Ddydd Calan.

Cafodd ei gludo i Ysbyty Maelor Wrecsam gydag anafiadau difrifol ond bu farw’n ddiweddarach.

Mae Heddlu Gogledd Cymru yn apelio ar i bobol sydd ag unrhyw wybodaeth am y digwyddiad i gysylltu â nhw ar 101, neu’n ddi-enw drwy ffonio Taclo’r Taclau ar 0800 555 111.