Simon Thomas
Mae llefarydd Plaid Cymru ar addysg wedi galw am gael un system arholi i osod cymwysterau TGAU a Lefel A mewn ysgolion a cholegau ledled Cymru ar gyfer pynciau prif-ffrwd, fel modd o safoni’r system.
Daw galwad Simon Thomas yn dilyn pryderon gafodd eu codi gan y corff sy’n goruchwylio cymwysterau, OFQUAL, fod papurau arholiad yn dod yn haws ac yn llai o her i ddisgyblion.
Mae AC Plaid Cymru dros Ganolbarth a Gorllewin Cymru wedi dweud ei fod yn bryderus iawn am “farchnadeiddio” cynyddol addysg . Esboniodd fod byrddau arholi yn cystadlu yn erbyn ei gilydd er mwyn i ysgolion gymryd eu cyrsiau nhw.
Dywedodd Simon Thomas: “Rwyf eisiau gweld cyflwyno cymwysterau safonol ledled y genedl fel nad yw byrddau arholi yn cystadlu yn erbyn ei gilydd ac yn ceisio ‘gwerthu’ cyrsiau i ysgolion.
‘Dewis y cyrsiau hawsaf’
“Y pryder yw y gall marchnadeiddio’r system gymwysterau arwain at demtio ysgolion i ddewis y cyrsiau ‘hawsaf’ yn hytrach na’r rhai sydd yn rhoi prawf ar alluoedd eu disgyblion.”
Dywedodd bod ysgolion yn teimlo dan bwysau cynyddol fod angen iddyn nhw “farchnata” eu hunain i rieni ac o ganlyniad yn chwilio am gyrsiau fydd yn sicrhau canlyniadau.
“Mae angen i Lywodraeth Cymru weithredu yn glir a phendant i ddiwygio’r system addysg, i’w gwneud yn addas at y diben yn hytrach nac yn addas at y farchnad.
“Er mwyn darparu cymwysterau sydd yn mesur galluoedd disgyblion, rhaid i ni fesur cyrhaeddiad addysgol. Yn benodol, ry’n ni angen system sydd yn sicrhau y dyfernir cymwysterau yn unig i fyfyrwyr gyda’r lefelau priodol o lythrennedd a rhifedd. Byddwn yn ceisio camau difrifol a phendant gan Lywodraeth Cymru yn hyn o beth.”
