Roy Hill (Llun Heddlu'r Gogledd)
Mae Heddlu’r Gogledd yn apelio am wybodaeth wrth iddyn nhw chwilio am ddyn 48 mlwydd oed sydd wedi mynd ar goll yn ardal Corwen.
Does neb wedi gweld Roy Hill ers 2.30 prynhawn dydd Sul, Ebrill 3. Mae’r heddlu yn canolbwyntio’r chwilio yn ardal Corwen a Wrecsam, lle gafodd o’i weld ddiwethaf.
Mae Roy Hill yn cael ei ddisgrifio fel dyn gwyn chwe throedfedd o daldra gyda gwallt llwyd byr. Y tro diwethaf iddo gael ei weld roedd yn gwisgo jîns tywyll, esgidiau Nike glas a brown a siaced ledr ddu.
Dywedodd Dylan Jones o orsaf heddlu’r Bala: “Rwy’n apelio ar unrhyw un sydd wedi gweld Roy, neu’n gwybod ble mae o, i gysylltu â’r Heddlu oherwydd ein bod yn pryderu am ei les. Hoffwn hefyd ofyn i Roy ei hun i gysylltu â’r Heddlu, ei deulu neu ffrindiau i adael iddyn nhw wybod ei fod yn ddiogel ac yn iach .”
Mae’r heddlu yn gofyn i unrhyw un all gynorthwyo â’r ymchwiliad i gysylltu â nhw drwy ffonio 101 neu Taclo’r Taclau ar 0800 555 111 a dyfynnu Rhif Person Coll 15252.
