Gŵr yn euog o geisio llofruddio ei wraig

Llys y Goron yr Wyddgrug
Mae dyn o Gaernarfon wedi ei gael yn euog o geisio llofruddio ei wraig, wrth iddi fynd â’i phlant i’r ysgol.

Ar ôl dwy awr a hanner o ystyried, cafodd y rheithgor yn Llys y Goron yr Wyddgrug Sylvan Parry, 46, yn euog o geisio llofruddio Fiona Parry, sy’n 40 oed.

Roedd wedi pledio’n euog i achosi niwed corfforol difrifol ond plediodd yn ddieuog o geisio ei llofruddio.

Clywodd y llys fod Sylvan Parry wedi sathru ar ben Fiona Parry sawl gwaith.

Cafwyd hyd iddi ar lôn yng Nghefn Cadnant, rhwng Ffordd Llanberis a Maesincla, gydag anafiadau difrifol i’w phen.

Roedd nifer o blant a oedd yn cerdded i’r ysgolion gerllaw, sef Ysgol Maesincla ac Ysgol Syr Hugh Owen, wedi gweld yr ymosodiad a ddigwyddodd am tua 9yb, ddydd Iau 3 Medi.

Cafodd yr achos ei symud o Gaernarfon i’r Wyddgrug gan fod yr achos yn cael ei drafod yn helaeth yn lleol.

Mae disgwyl i Sylvan Parry gael ei ddedfrydu yfory.