Mae Llys Ynadon Llandudno wedi rhewi cyfrifon Americanwr gafodd ei ddal yng Nghymru ar ôl bod ar ffo am 21 o flynyddoedd.
Cafodd Daniel Andreas San Diego, sy’n 46 oed, ei arestio ym Maenan ger Llanrwst ym mis Tachwedd.
Aeth gerbron y llys trwy gyswllt fideo o garchar Belmarsh yn Llundain heddiw (dydd Llun, Ionawr 6).
Fe wnaeth yr heddlu gais i rewi ei gyfrifon am flwyddyn er mwyn parhau â’u hymchwiliad.
Daeth ymchwilwyr i wybod am dri chyfrif â thros £20,000 ynddyn nhw yn enw ‘Danny Webb’, sef ffugenw ddefnyddiodd Daniel Andreas San Diego, sydd yn y ddalfa yn aros i gael ei estraddodi i’r Unol Daleithiau.
Cefndir
Mae Daniel Andreas San Diego wedi’i amau o ffrwydro bom mewn dau adeilad yn San Francisco yn 2003.
Cafodd ei arestio fis Tachwedd yn dilyn ymchwiliad ar y cyd rhwng Heddlu’r Gogledd a’r Asiantaeth Torcyfraith Genedlaethol.
Mae lle i gredu ei fod e wedi bod yn byw ym Maenan ers nifer fawr o flynyddoedd, gan ddefnyddio ffugenw.
Mae’n cael ei ddisgrifio fel “eithafwr hawliau anifeiliaid” gan yr FBI.
