Dyma gyfres newydd sy’n agor y drws ar rai o gaffis Cymru, lle byddwn ni’n siarad efo perchnogion y busnesau yma sydd, yn aml, yn ganolbwynt y gymuned. Y bwyd, y coffi, y cwsmeriaid, yr heriau a’r troeon trwstan – bydd digon ar y fwydlen i gnoi cil drosto.
Yr wythnos hon, Hana Dyer, perchennog Nest yn Rhuthun, Sir Ddinbych sy’n cael sgwrs dros baned efo golwg360…
Rydan ni wedi bod ar agor rŵan ers bron i bedwar mis, ac yn dal i drio cyfarwyddo efo bob dim ar ôl agor yng nghanol prysurdeb gwyliau’r haf – roedd hi’n wallgof! Tan fis Ebrill eleni ro’n i’n berchen ar siop goffi llawer llai yn y dref. Ar ôl rhedeg Y Caban am bum mlynedd roedd hi bendant yn amser ehangu i safle mwy, lle ro’n i’n gallu cynnig lot mwy.
Rydan ni’n gweini coffi a chacen ar hyn o bryd, a’r syniad ydy gwneud brecinio a chinio (ac efallai clwb swper bob mis) yn y flwyddyn newydd. Mae hyn yn rhywbeth roedden ni wedi bwriadu gwneud yn syth ar ôl agor, ond mae wedi bod mor brysur ers y diwrnod cyntaf, wnaethon ni benderfynu cyflwyno pethau’n araf.
Mae ein cwsmeriaid i gyd mor wahanol, mae’n wych ein bod ni’n gallu cynnig rhywbeth ar gyfer cymaint o wahanol grwpiau. Mae gynnon ni bobl sy’n dod i mewn ar eu pen eu hunain gyda llyfr am ychydig o lonyddwch a thawelwch, teuluoedd, ffrindiau’n dal i fyny dros goffi, mamau newydd, neiniau a theidiau yn dod â’r wyrion am drît ar ôl ysgol, mae’n eang iawn.
Rydan ni’n gwneud ein gorau i gadw popeth mor lleol â phosibl – rydan ni’n cael ein cacennau gan Marina (Marina’s Italian Cookery), a Dafydd (Welsh Whisk) – mae’r ddau yn lleol i Ruthun; mae’n llefrith yn dod o fferm Pentrefelin yn Llandyrnog, daw’r coffi o Wrexham Bean, ac mae’r blodau sych bendigedig yn cael eu gwneud gan yr hyfryd Sioned [Edwards] Pont y Tŵr [ger Rhuthun]. Os ydan ni’n cefnogi busnesau lleol, mae’r arian yn mynd mewn i’n heconomi leol ac mae’n golygu ein bod ni hefyd mor gynaliadwy â phosib.
Rydan ni wedi dechrau cynnal digwyddiadau cerddoriaeth fyw bob mis. Mae’r rhan fwyaf ohonyn nhw’n fandiau o’r ardal leol – mae’n dda gallu hyrwyddo bandiau newydd ac mae’n golygu bod pobl yn dod i adnabod bandiau lleol sydd wir yn gwneud cerddoriaeth wych. Yn ystod y digwyddiadau yma rydan ni’n cynnig amrywiaeth o gwrw lleol, fel Wild Horse o Landudno, coctêls, a gwirodydd unigryw fedrwch chi ddim prynu mewn archfarchnad. Dydd Sadwrn yma (Rhagfyr 14) mae gynnon ni Doggy LeBosch yn perfformio a Jacob Elwy y penwythnos wedyn. ‘Dan ni’n gobeithio dod ag ychydig o adloniant i Ruthun cyn y Nadolig!
I’r rhai sydd eisiau gwneud rhywbeth mwy iachus, ‘dan ni newydd ddechrau clwb rhedeg ein hunain bob nos Iau am 7pm. Mae’n addas ar gyfer pobl o bob gallu, ac yn fwy o glwb cymdeithasol. Ar ddiwedd y 5k mae pawb yn dod at ei gilydd am goffi a sgwrs, ac mae gostyngiad o 10% i’r rhedwyr.
Mae yna heriau i redeg siop goffi, yn enwedig gan nad ydw i’r person mwya’ trefnus! Ond mae mwy o fanteision nag anfanteision – ‘dan ni’n cyfarfod pobl newydd ac yn gweld wynebau cyfarwydd bob dydd, mae ein cwsmeriaid rheolaidd yn teimlo fel teulu erbyn hyn a dw i’n teimlo’n ffodus iawn i gael y gefnogaeth yna bob dydd.
