Wedi gwledda’r Nadolig, rwy’ o hyd yn ysu am sbeis a gweadau gwahanol i’m prydau bwyd. Mae Ionawr yn amser gwych i arbrofi â blasau newydd a chyfuniadau diddorol ac anghyffredin.
Weithiau, mae’r cyfuniadau yn gweithio (a dro arall efallai nad ydyn nhw). Ond dyma, yn fy marn i, gyfuniad blasus ac anghyffredin i gyd-fynd â chig eidion; rhywbeth bur wahanol i’r horseradish a’r mwstard sydd mor gyfarwydd i ni gyd.
Mwynhewch y darn gorau (y bwyta, wrth gwrs!), a pheidiwch â bod ofn arbrofi gyda chynhwysion rydych chi’n eu mwynhau!
Bydd angen:
- Darn o gig eidion Silverside
- Menyn
- Garlleg (4 gewin)
- 2 nionyn
- Sinsir (wedi’i gratio) – 2 fodfedd
- Saws Soy
- 4 tsili
- 2 lwy de o ciwmin
- Caws (o’ch dewis)
- Pupur a halen
- 4 bagét
Coginio
Cynheswch y popty i 180 gradd (nwy 4)
Gwasgarwch bupur, halen ac unrhyw berlysiau neu sbeisys o’ch dewis, a’i rwbio i mewn i’r cig.
Gosodwch y cig ar dun rhostio addas, gyda’r ochr brasterog i fyny.
Rhostiwch y cig gan ganiatáu oddeutu 20 munud i bob 500g am gig eidion canolig-lled amrwd (medium rare)
Defnyddiwch thermomedr i wirio’r tymheredd. Dylai canolig-lled amrwd fod tua 57-60 gradd.
Tynnwch y cig o’r popty a’i adael i sefyll am 10-15 munud cyn ei dorri.
Torrwch y cig yn sleisus tenau i’w weini.
Mewn padell, toddwch y menyn dros wres canolig. Ychwanegwch y garlleg, nionyn, sinsir, a’r tsili a’u coginio nes bod y nionod yn dryloyw.
Ychwanegwch y saws soy a’r ciwmin, gyda halen a phupur (fel y mynnoch), gan droi’r cymysgedd.
Rhannwch y cymysgedd nionod, tsili, garlleg a sinsir yn gydradd ar y bagetiau, gan ychwanegu cig eidion ar bob un.
Gosodwch y caws (o’ch dewis) ar ben y cig eidion.
Cynheswch y brechdanau nes bod y bara’n cael ei dostio a’r caws yn cael ei doddi.
Gweiniwch y brechdanau yn boeth, a mwynhewch!
Blwyddyn Newydd Dda!
