BT yn creu 60 prentisiaeth yng Nghymru

Cyfarwyddwr BT Cymru, Alwen Williams wedi croesawu'r cyhoeddiad
Mae BT wedi cyhoeddi eu bod nhw’n bwriadu creu 60 prentisiaeth newydd yng Nghymru, mewn meysydd gan gynnwys diogelwch y we a datblygu meddalwedd.

Dywedodd y cwmni bod y prentisiaethau, sydd ymhlith 1,400 yng ngwledydd Prydain, yn rhan o’u hymdrech i hyfforddi staff a fyddai â sgiliau digidol defnyddiol ar gyfer y dyfodol.

Mae disgwyl i’r prentisiaid yng Nghymru gael eu recriwtio yn ardaloedd Abertawe, Aberystwyth, Caerdydd, Caerfyrddin, Casnewydd, Hwlffordd, Machynlleth a Wrecsam.

Bydd lleoliadau ar gyfer graddedigion hefyd yn cael eu creu yng Nghaerdydd.

‘Hanfodol i Gymru’

Dywedodd BT y byddai’r prentisiaethau yn cael eu creu mewn sawl rhan o’u busnes, gan gynnwys gyda rhwydwaith ffonau symudol EE a’r busnes rhwydwaith leol Openreach.

Cafodd y cyhoeddiad am y swyddi newydd ei groesawu gan gyfarwyddwr rhanbarthol BT Cymru, Alwen Williams.

“Mae’r prentisiaethau a swyddi graddedigion yma’n cynnig cyfleoedd gwych i bobol yng Nghymru fod yn rhan o un o’r diwydiannau mwyaf cyffrous ac sy’n datblygu fwyaf sydyn, gydag un o’r cwmnïau mwyaf ym Mhrydain,” meddai.

“Fe fydd y recriwtiaid newydd yn chwarae rôl bwysig wrth ddarparu gwasanaethau hanfodol a helpu busnesau a chartrefi’r rhanbarth i wneud y mwyaf o dechnoleg sydd yn trawsnewid y ffordd rydyn ni’n byw.

“Mae gyrfaoedd o safon uchel fel rhain yn hanfodol i lwyddiant a ffyniant Cymru yn y dyfodol.”