Mae Vaughan Gething wedi cadarnhau y bydd yn sefyll i fod yn arweinydd nesaf Llafur Cymru.
Daw’r neges ar y cyfryngau cymdeithasol ar ôl i’r Prif Weinidog Mark Drakeford gadarnhau ddoe (dydd Mercher, Rhagfyr 13) nad yw am barhau yn y swydd ar ôl pum mlynedd wrth y llyw.
Mae disgwyl i’r Prif Weinidog gamu o’r neilltu ym mis Mawrth, pan fydd y ras am yr arweinyddiaeth yn cychwyn.
“Dros y bum mlynedd mae Cymru wedi delio â chynni, Brexit, pandemig Covid, argyfwng yr hinsawdd, rhyfeloedd yn Wcráin a’r Dwyrain Canol a phedwar Prif Weinidog – hyd yn hyn – felly bydd digon i adlewyrchu arno,” meddai Mark Drakeford wrth gyhoeddi ei benderfyniad.
“Am nawr, byddai’n parhau i weithio gyda fy holl nerth ar yr addewidion wnaethon i bobol Cymru.
“Mae hi wedi bod fraint fawr arwain Llafur Cymru a Llywodraeth Cymru.
“Rwyf hefyd wedi cael y fraint enfawr i chwarae rhan yng ngwleidyddiaeth Cymru yn ystod chwarter canrif gyntaf datganoli.
“Nawr yw’r amser i edrych ymlaen at y bum mlynedd nesaf dros y Deyrnas Unedig, a’r pum-mlynedd-ar-hugain nesaf o ddatganoli yng Nghymru.”
‘Byddaf yn sefyll’
Bellach, mae Vaughan Gething, Gweinidog yr Economi, wedi cadarnhau y bydd yn taflu ei enw i’r het i olynu Mark Drakeford yn arweinydd Llafur Cymru a Phrif Weinidog Cymru.
Ynghlwm wrth y neges mae datganiad sy’n ymhelaethu ar ei benderfyniad.
Mae'n anrhydedd cael gymaint o negeseuon o gefnogaeth o bob rhan o'n mudiad.
Byddaf yn sefyll i fod yn arweinydd nesaf Llafur Cymru.🌹🏴 pic.twitter.com/IbsFEMAhzu
— Vaughan Gething (@vaughangething) December 14, 2023
Cefnogaeth i Jeremy Miles
Yn y cyfamser, mae dwy o weinidogion Llywodraeth Cymru – Julie James a Lesley Griffiths – wedi datgan eu cefnogaeth i Jeremy Miles, Gweinidog Addysg a’r Gymraeg yn y llywodraeth, pe bai’n penderfynu sefyll.
Does dim cadarnhad o hynny eto, ond mae disgwyl y bydd e’n cyflwyno’i enw dros y dyddiau nesaf.
“Wrth i ni ddechrau’r drafodaeth am y dyfodol nawr, mae angen arweinydd Llafur Cymru a Phrif Weinidog newydd sy’n uchelgeisiol dros Gymru a’n holl gymunedau,” meddai Julie James.
“Fy ngalwad gyntaf yn dilyn cyhoeddiad Mark oedd Jeremy Miles, i’w annog e i sefyll am arweinyddiaeth ein plaid.”
‘Apelio i bobol ar draws y wlad’
“Dw i’n gwybod sut beth yw brwydro etholiadau anodd,” meddai Lesley Griffiths.
“Doedd hi ddim yn hawdd adennill Wrecsam i Lafur Cymru yn 2007.
“Er mwyn sicrhau bod gennym ni ddwy lywodraeth yn cydweithio dros Wrecsam a’r gogledd, mae angen i ni adennill y sedd yn Senedd y Deyrnas Unedig yn yr etholiad cyffredinol nesaf.
“Er mwyn trechu’r Torïaid yn 2024, mae angen i arweinydd a Phrif Weinidog nesaf Llafur Cymru apelio i bobol ledled y wlad, cydweithio â Keir Starmer i ennill mewn seddi ymylol, a chydweithio i weithredu dros ddyfodol Cymru.
“Dyna pam dw i’n cefnogi Jeremy Miles i fod yn arweinydd a Phrif Weinidog nesaf Llafur Cymru.
“Ar ôl gwasanaethu â Jeremy yn y llywodraeth, dw i’n gwybod fod ganddo fo’r hyn sydd ei angen i ennill dros Lafur a thros ogledd Cymru.
“Gallwch fod yn sicr y bydd Llywodraeth Lafur Cymru dan arweiniad Jeremy Miles yn gwrando ar leisiau a phryderon yma yn y gogledd, ac yn sicrhau bod Llywodraeth Lafur Cymru’n parhau i weithio drosom i gyd.”
