Mae mam o Wrecsam sy’n helpu rhieni a’u plant i gysgu’n well yn y nos yn dweud bod diffyg cwsg yn ddrwg i’r iechyd meddwl a chorfforol.
Mae’r rhesymau am ddiffyg cwsg yn niferus, yn ôl Rhian Mills, sy’n dweud bod y cyflwr yn fwy cyffredin o lawer yn yr oes sydd ohoni.
Dywed fod diffyg cwsg yn cael cryn effaith ar iechyd meddwl a chorfforol, a’i fod yn gallu gwneud i ni deimlo’n waeth.
“Os dydyn ddim yn cael digon o gwsg, rydym yn fwy tebygol o ddioddef o ganser, afiechyd y galon a diabetes,” meddai wrth golwg360.
“Mae hefyd yn effeithio ar ein hiechyd meddwl.
“Os dydyn ddim yn cael digon o gwsg, rydym yn fwy tebygol o deimlo’n isel a hefyd teimlo’n flin.
“Mae’n golygu ein bod ni’n methu canolbwyntio gymaint.
“Rydym yn fwy tebygol o wneud camgymeriadau a chael damweiniau.
“Hefyd, mae’n lleihau ein motivation i wneud ymarfer corff ac i fwyta’n iach.
“Mae’n effeithio ar ein hiechyd mewn llawer o wahanol ffyrdd.”
Helpu pobol i gysgu
Wrth helpu plant i gysgu’n well yn y noson, mae hynny yn ei dro yn helpu rhieni i gysgu’n well hefyd.
“Rwy’n helpu rhieni efo plant pedwar mis oed hyd at saith mlwydd oed,” meddai Rhian Mills wedyn.
“Rwy’n gweithio efo rhieni i gael patrymau cwsg gwell i mewn i’r plant gael cysgu’n well.
“Yn ei dro, mae hynny’n golygu bod y rhieni yn cysgu’n well.”
Mae diffyg cwsg yn broblem gynyddol wrth i bobol dreulio mwy o amser o flaen sgriniau a gweithio gartref.
“Mae yna lawer o bethau yn mynd ymlaen,” meddai.
“Mae pobol, fel maen nhw’n mynd yn hŷn, yn tueddu i stryglo efo cwsg.
“Hefyd, mae yna gymaint yn mynd ymlaen y dyddiau yma, mae pawb yn byw bywydau prysur.
“Os ydy rhywun yn stressed, maen nhw’n mynd i’w ffeindio fo’n anodd mynd i gysgu, ac maen nhw’n mynd i ddeffro mwy yn y nos.
“Hefyd, mae yna fwy o sgriniau y dyddiau yma, mae pawb ar ffonau gyda’r nos, neu ar dabledi.
“Hefyd, mae pobol yn gweithio gartref mwy ers y pandemig, ac wedyn rwy’n meddwl bod pobol yn ei ffeindio fo’n anodd i switsio i ffwrdd o’r gwaith.”
Pum cyngor golwg360 i’ch helpu i gysgu:
- Ewch i’r gwely yr un amser bob nos, a deffrwch yr un amser bob dydd
- Ymlaciwch am o leiaf awr cyn mynd i’r gwely – darllenwch lyfr neu ewch i’r bath
- Sicrhewch fod eich ystafell wely’n dywyll ac yn dawel – defnyddiwch lenni neu orchudd ffenest, masg a chlustffonau os oes angen
- Gwnewch ymarfer corff yn rheolaidd yn ystod y dydd
- Sicrhewch fod eich gwely a’ch dillad gwely’n gyfforddus
