Mae papur bro hynaf Cymru wedi cyhoeddi rhifyn arbennig i ddathlu 50 mlynedd yr wythnos hon.
Cafodd Y Dinesydd ei lansio yng Nghaerdydd ym mis Ebrill 1973, a syniad y diweddar Dr Meredydd ‘Merêd’ Evans oedd dechrau’r papur.
Daeth un rhes o bapurau tebyg o bob cwr o Gymru ar ei ôl, ond fel sawl papur bro arall mae cylchrediad y papur wedi gostwng dros y degawd diwethaf, ac mae pwyllgor Y Dinesydd yn awyddus iawn i gael gwaed newydd a denu darllenwyr iau.
Gwilym Dafydd, sydd yng ngofal colofn siaradwyr newydd y papur ac ar bwyllgor Y Dinesydd ers 2013, oedd yn gyfrifol am gydlynu’r rhifyn arbennig i ddathlu’r pen-blwydd.
‘Denu gwaed ifanc’
Yr her nawr ydy denu darllenwyr a chyfranwyr ifanc, ynghyd â chael aelodau iau ar y pwyllgor, meddai Gwilym Dafydd wrth siarad â Golwg.
Pan ddechreuodd ar y pwyllgor, roedd 750 o gopïau caled yn cael eu cyhoeddi bob mis, ond mewn degawd ers hynny mae wedi gostwng i 390 copi. Mae tua 100 o bobol yn derbyn copïau digidol dros e-bost hefyd.
“Peth arall sy’n broblem i ni, fel papurau bro yn gyffredinol dw i’n meddwl, yw cyfartaledd oedran y darllenwyr,” meddai.
“Mae llawer iawn yn eu 80au a’u 90au.
“Mae tanysgrifiadau newydd yn dod i law, ond ychydig iawn o ddarllenwyr sydd dal i weithio.
“Does dim llawer o bobol o dan 60 oed yn tanysgrifio. Materion y mae’n rhaid i ni drio’u datrys eleni yw bod rhaid i ni gael pobol ifancach ar y pwyllgor.
“Be’ sy’n ddiddorol yw pan rydych chi’n sôn am yr hen ddyddiau ar y cychwyn, roedd y bobol gynnar yma’n weddol ifanc.
“Roedd Merêd yn ei 40au yn 1973, y golygydd cyntaf Norman Williams, 26 oed oedd e, sy’n rhyfeddol.
“Pobol hŷn sydd ar y pwyllgor ar wahân i ambell un. Hwnna yw’r her i’r dyfodol, rydyn ni angen gwaed ifancach.
“Y ffyddloniaid sydd yn darllen y papur ac yn talu amdano fo, maen nhw’n werthfawrogol iawn.
“Mae’r rhai sydd dal gyda ni wedi darllen y papur ers degawdau lawer.
“Mae’r dysgwyr hefyd yn dda, dw i’n gwneud Clonc i’r dysgwyr ac maen nhw’n dda iawn yn cefnogi.”
