Mae Andrew RT Davies, arweinydd y Ceidwadwyr Cymreig, wedi brolio’r “cysylltiadau cryfach fyth” rhwng Cymru a’r teulu brenhinol, yn dilyn ymweliad Tywysog a Thywysoges Cymru â’r Senedd.
Roedd William a Catherine yn y Senedd ym Mae Caerdydd ddoe (dydd Mawrth, Tachwedd 15), ar y diwrnod pan oedd carfan bêl-droed Cymru yn paratoi i deithio i Qatar ar gyfer Cwpan y Byd, y tro cyntaf iddyn nhw gymhwyso ers 1958.
Daeth yr ymweliad brenhinol drannoeth ymweliad William â charfan bêl-droed Lloegr i gyflwyno rhifau eu crysau iddyn nhw ar gyfer y gystadleuaeth.
Mae rhai wedi beirniadu’r ymweliad, gan y bydd Cymru a Lloegr yn chwarae yn yr un grŵp yn Qatar.
Ond mae eraill, fel Andrew RT Davies, yn falch o’r cyfle i gryfhau’r cysylltiadau rhwng Cymru a’r teulu brenhinol.
🏴 @Cymru pic.twitter.com/klFbZ765qL
— Andrew RT Davies (@AndrewRTDavies) November 15, 2022
‘Pleser’
“Roedd hi’n bleser croesawu Tywysog Cymru i’r Senedd heddiw i drafod dyfodol ein cenedl wych a’r rôl y bydd yn chwarae ynddi, yn ogystal â’r achosion mae’n eu hyrwyddo ynghylch iechyd meddwl a’r amgylchedd y mae llawer o bositifrwydd tuag ato,” meddai Andrew RT Davies.
“Ar ôl ymweliad diweddar y Brenin a’r Frenhines, mae’n wych gweld y clymau rhwng Cymru a’n Teulu Brenhinol yn dod yn gryfach fyth.
“Mae ewyllys da enfawr tuag at y Tywysog a’r Dywysoges yng Nghymru, a dw i’n gwybod y bydd croeso cynnes iddyn nhw bob amser pryd bynnag y byddan nhw’n dod ar ymweliad.”
