Fe wnaeth pôl piniwn golwg360 ar agor trydedd bont ym Môn hollti barn ein darllenwyr.
Roedd 49.2% yn credu bod angen un arall, tra bod 35.5% yn dweud nad oes angen un arall.
Roedd 15.3% yn ansicr y naill ffordd neu’r llall.
Mae Pont Menai wedi’i chau oherwydd problemau diogelwch, a fydd hi ddim yn agor eto nes bod y problemau wedi cael eu datrys.
Ar hyn o bryd, does neb yn gwybod pryd fydd y bont yn cael ei defnyddio eto.
Nid yn unig mae’r ffaith bod y bont wedi cau wedi bod yn anghyfleus i’r cyhoedd, ond mae busnesau lleol hefyd yn dioddef.
Roedd sôn rai blynyddoedd yn ôl am godi trydedd bont i Ynys Môn.
Ers Brexit a’r lleihad yn y traffig lorïau trwm o Iwerddon, fe fu llai o achos tros godi trydedd bont bellach, ac mae ein pôl yn dangos bod barn y cyhoedd yn rhanedig hefyd.
Safbwyntiau amrywiol
Dyma’r cwestiwn gafodd ei ofyn yn ein pôl:
❓ P Ô L P I N I W N ❓
A ddylid adeiladu trydedd bont i Ynys Môn?🏗
— Golwg360 (@Golwg360) November 3, 2022
Yn ôl un wnaeth ymateb, Alan I. (@ynolalan), “Pleidleisiais i ddim yn siŵr”.
“Yn anaml iawn mae creu mwy o ffyrdd yn datrys problemau traffig.
“Datrysiad arall – codi toll ar y pontydd, neu ar y pontydd i Ynys Gybi, efo eithriad i drigolion Sir Fôn, a’i defnyddio i ariannu bysiau am ddim rhwng Bangor a’r ynys.
“Y rhai sy’n gyrru trwy’r ynys i’r porthladd fferïau all dalu!”
Fe wnaeth Watercolour Phil (@Draig1959) gynnig ateb ychydig yn wahanol, gan ddweud mai’r ateb yw y “dylid adeiladu ffordd ddeuol”.
Ond yn ôl Dyn drws nesa (@gwalchiwr), “does dim problem traffig – 95% o’r amser”.
“Dipyn o oedi at amser bore a phnawn,” meddai.
“Os bysa gyrrwyr yn ymuno â’r traffig y ffordd iawn, bysa llawer llai o oedi, a traffig yn symud yn rhwyddach.
“Nid yw’r mân oedi hwn yn cyfiawnhau trydydd groesfan!”
