Mae Llywodraeth Cymru wedi cadarnhau y bydd y rhestrau teithio gwyrdd ac oren yn cael eu cyfuno.
Fydd dim rhaid i bobol sydd wedi cael eu brechu’n llawn gael prawf cyn hedfan chwaith.
Maen nhw’n bwriadu gwneud y newidiadau erbyn Hydref 4, gan gyd-fynd â system newydd Llywodraeth y Deyrnas Unedig.
Dydy Llywodraeth Cymru ddim wedi gwneud penderfyniad eto ynglŷn â pheidio â defnyddio profion PCR, ond maen nhw wedi dweud yn glir eu bod nhw’n gwrthwynebu’r newid.
Maen nhw’n galw ar Lywodraeth y Deyrnas Unedig i wyrdroi eu penderfyniad.
‘Dull gofalus’
Dywed Eluned Morgan, Ysgrifennydd Iechyd a Gwasanaethau Cymdeithasol Cymru, fod Llywodraeth Cymru wedi galw’n gyson am “ddull gofalus o ymdrin â theithio rhyngwladol”.
“Rydyn ni wedi galw’n gyson am ddull gofalus o ymdrin â theithio rhyngwladol er mwyn atal ailgyflwyno coronafeirws i’r Deyrnas Unedig, yn enwedig amrywiolion newydd ac amrywiolion sy’n dod i’r amlwg, na fydd efallai’n ymateb i’r brechlynnau,” meddai.
“Mae’r penderfyniad i beidio â’i gwneud yn ofynnol i deithwyr sy’n dychwelyd wneud profion PCR ar ddiwrnod dau yn peri pryder.
“Mae’r prawf hwn, a dadansoddi dilyniant genom yr holl ganlyniadau positif, yn rhan allweddol o’n gwyliadwriaeth ar gyfer coronafeirws, gan hefyd ddiogelu ein ffiniau rhag y feirws.
“Rydyn ni’n cydnabod yr heriau cyfathrebu a gorfodi a geir yn sgil gofynion profi gwahanol, ac rydyn ni’n parhau i archwilio’r dystiolaeth am drefn brofi i Gymru yn unig, ond y ffordd orau o ddiogelu iechyd y cyhoedd yw i Lywodraeth y Deyrnas Unedig ailgyflwyno profion ar gyfer y Deyrnas Unedig gyfan.”
Mae Llywodraeth Cymru’n ystyried i ba wledydd y bydd yn ymestyn y system adnabod tystysgrifau brechu yn ystod yr wythnosau nesaf.
