Mae aelod seneddol Ceidwadol Ynys Môn wedi’i phenodi’n Ysgrifennydd Preifat Seneddol yn swyddfa Simon Hart, Ysgrifennydd Cymru, ac yn addo parhau i ddysgu’r iaith Gymraeg.
Daw’r penodiad ar ôl i Boris Johnson, prif weinidog Prydain, ad-drefnu Cabinet Llywodraeth Prydain yr wythnos ddiwethaf, gan gadw Hart yn y swydd.
Yn y gorffennol, bu’n Ysgrifennydd Preifat Seneddol yn yr Adran Iechyd a Gofal Cymdeithasol.
Mae datganiad gan y blaid yn egluro y bydd Crosbie yn “llygaid a chlustiau” ychwanegol i Ysgrifennydd Cymru â’i dîm gweinidogol yn Nhŷ’r Cyffredin, gan sicrhau bod materion, pryderon a chwestiynau aelodau seneddol yn ei gyrraedd.
Dywed Virginia Crosbie ei bod hi “wrth ei bodd” o gael ei phenodi i swydd “wrth galon Llywodraeth y Deyrnas Unedig a gwneud penderfyniadau am Gymru”.
“Bydd yn fraint cael cefnogi gweinidogion ac, yn bwysig, sicrhau bod Ynys Môn ym mlaen ac wrth galon polisi’r Llywodraeth,” meddai.
“Gallaf sicrhau pawb y bydda i’n parhau i lobïo am ragor o swyddi, cyflogaeth â sgiliau a buddsoddiad i bobol yr ynys.
“Mae hefyd yn fy ysgogi ymhellach i barhau i ddysgu’r iaith Gymraeg!”
