Mae teulu merch ifanc fu farw mewn gwrthdrawiad ger Arberth ddydd Gwener, Awst 20, wedi talu teyrnged iddi.
Bu farw Beca Mai Richards, 23 oed o Langain ger Caerfyrddin, yn yr ysbyty heddiw (dydd Iau, Awst 26), yn dilyn y gwrthdrawiad ym Mhenblewyn.
Mewn teyrnged, mae’r teulu wedi cyfeirio at eu balchder wedi i Beca, “sydd o hyd wedi gofalu am eraill”, roi organau i helpu a rhoi bywyd gwell i eraill.
“Rydym wedi ein chwalu’n llwyr o golli Beca,” meddai’r teulu.
“Roedd hi’n ferch, chwaer, ffrind ac athrawes llawn cariad a charedigrwydd ac yn un sydd o hyd wedi gofalu dros eraill.
“Rydym yn ymfalchïo fod dymuniad Beca wedi’i wireddu, fel ei chymwynas olaf, i fod yn rhoddwr, er mwyn cynnig bywyd gwell i eraill.
“Fel teulu, hoffem ddiolch i bawb, yn enwedig yr Uned Gofal Dwys ac Ambiwlans Awyr Cymru, am eu cefnogaeth a gofal dros y dyddiau diwethaf.
“Ein dymuniad nawr yw cael amser i alaru’n breifat.”
