Mae adroddiadau bod dyn 52 oed wedi marw mewn campfa yng Nghasnewydd yn dilyn trawiad y galon.
Yn ôl y rhai oedd yn hyfforddi yng nghampfa ‘Pure Gym’ ar y pryd, bu farw’r dyn yn fuan ar ôl dod oddi ar beiriant a chwyno ei fod yn teimlo’n sâl tua 11:30 nos Fercher (21 Gorffennaf).
Yna aeth y dyn i’r ystafell ymolchi, a phenderfynodd hyfforddwr arall ei ddilyn.
“Roedd gen i deimlad bod rhywbeth o’i le pan welais ef yn mynd i’r ystafell ymolchi,” meddai’r dyn, oedd ddim am gael ei enwi wrth Wales Online.
“Wrth i mi ddod allan o’r toiled roedd ar y llawr ac yn dal i ailadrodd bod ganddo boenau yn ei frest ac nad oedd yn gallu anadlu.
“Fe wnaethon ni ei roi yn y safle cywir a galw’r gwasanaethau brys. Ond yna collodd ymwybyddiaeth ac roeddem yn gwybod pa mor ddifrifol oedd y sefyllfa.
“Rhedodd rhywun i gael y diffibriliwr.”
Ond er gwaethaf ymdrechion gorau’r bobol o’i gwmpas, bu farw’r dyn yn y fan a’r lle.
Mae’r Gwasanaeth Ambiwlans yn cynnal ymchwiliad oherwydd bod yr ambiwlans wedi cymryd 45 munud i gyrraedd y gampfa.
Dywedodd llefarydd ar ran Gwasanaeth Ambiwlans Cymru: “Cawsom ein galw am 11.41pm neithiwr, nos Fercher 21 Gorffennaf, i’r Pure Gym yng nghanol dinas Casnewydd i adroddiadau am argyfwng meddygol.
“Anfonom ddau gerbyd ymateb cyflym, un ambiwlans brys a’n tîm adalw a throsglwyddo meddygol brys.
“Does dim manylion pellach ar gael.”
