Mae Parc Cenedlaethol Eryri wedi cyflwyno mesurau newydd i fynd i’r afael â heriau yn yr ardal wrth i’r cyfyngiadau clo lacio.
Pan ddaeth y cyfnod clo i ben y llynedd, daeth niferoedd uchel iawn o ymwelwyr i Eryri, a chododd nifer o broblemau gyda pharcio.
Mae’r Parc Cenedlaethol yn rhagweld y bydd nifer uchel iawn o ymwelwyr dydd yn ymweld â’r Parc eto eleni, a bydd y mesurau yn ceisio mynd i’r afael â phroblemau parcio.
Bydd eu cynlluniau yn cynnwys creu mwy o lefydd parcio yn Llanberis ar gyfer defnyddio’r system parcio a theithio i gyrraedd Pen y Pas.
Yn dilyn treial llwyddiannus y llynedd, mae’r Parc hefyd yn cyflwyno cynllun i ragarchebu lle parcio ym Mhen y Pas.
Mae’n fwriad i’r Parc Cenedlaethol a’u parterniaid drafod y posibilrwydd o ehangu’r gwasanaeth parcio a theithio hefyd.
Cynllunio o flaen llaw
O ystyried gweithgareddau cyfathrebu’r Parc Cenedlaethol, bydden nhw’n annog pobol i ymweld ar amseroedd gwahanol yn ystod yr wythnos neu’r flwyddyn.
Pan yn briodol, a dim ond pan fod isadeiledd addas a chapasiti yn caniatáu, bydden nhw’n annog pobol i ymweld â llefydd gwahanol i’r cyrchfanau poblogaidd.
Yn ogystal, bydd y Parc Cenedlaethol yn annog pobol i gynllunio o flaen llaw er mwyn lleihau parcio a champio anghymdeithasol, a materion yn ymwneud â champerfans.
Bydd eu cynlluniau yn cynnwys annog ymwelwyr i ddefnyddio meysydd campio a glampio, gan ganolbwyntio ar fynd i’r afael â champio gwrth-gymdeithasol.
Daeth i’r amlwg llynedd nad oedd nifer o drigolion Llanberis yn teimlo’n saff yn eu pentref, ac mae rhai wedi codi pryderon ynghylch twristiaid yn dychwelyd i Eryri eleni.
Fel rhan o’u hymgyrch #CynllunioCanfodCaru bydd y Parc Cendlaethol yn ceisio tawelu pryderon y cymunedau, fel eu bod nhw, a’u partneriaid, yn gwarchod ac yn cyfleu anghenion yr ardal.
