Mae cynlluniau i newid terfyn cyflymder o 30 milltir yr awr i 20 milltir yr awr ar ffyrdd Cymru gam yn agosach wedi i Lywodraeth Cymru gadarnhau bydd wyth ardal beilot yn treialu’r cynllun newydd.
Dywedodd Lee Waters, Dirprwy Weinidog yr Economi a Thrafnidiaeth, y bydd y newid yn lleihau damweiniau ac yn achub bywydau.
Mae’r ardaloedd sydd wedi’u dewis yn cynrychioli gwahanol fathau o leoliadau ar draws Cymru, gan gynnwys pentrefi, trefi a dinasoedd.
Yna y nod yw cyflwyno’r cynllun genedlaethol ymhen dwy flynedd, yn Ebrill 2023.
‘Arbed bywydau’
“Mae gwneud 20mya y terfyn cyflymder diofyn mewn ardaloedd preswyl yn gam beiddgar a fydd yn arbed bywydau,” meddai Lee Waters, Dirprwy Weinidog yr Economi a Thrafnidiaeth.
“Rydym wedi gwneud cynnydd o ran lleihau marwolaethau ac anafiadau difrifol ar ein ffyrdd dros yr 21 mlynedd o ddatganoli, ond er gwaethaf ein hymdrechion sylweddol digwyddodd y gyfran uchaf o’r holl anafusion – 50% – ar ffyrdd 30mya yn ystod 2018. Ni ellir goddef hyn, felly mae’n rhaid taw gostyngiad i 20 mya ar ein ffyrdd preswyl a threfol eraill lle mae gweithgaredd prysur i gerddwyr yw’r ffordd ymlaen.
“Mae gostwng cyflymderau yn lleihau damweiniau ac yn arbed bywydau, ac ochr yn ochr â hyn bydd ansawdd bywyd yn gwella, gan wneud lle ar ein strydoedd ar gyfer teithio llesol mwy diogel.
“Mae hyn yn helpu i leihau ein heffaith amgylcheddol ac mae ganddo ganlyniad cadarnhaol i’n lles corfforol a meddyliol.”
Bydd ffyrdd sydd â chyfyngiad 30mya ar hyn o bryd ac sydd â goleuadau stryd yn yr ardaloedd hyn yn rhan o’r cynllun peilot:
- Y Fenni, Sir Fynwy
- Canol Gogledd Caerdydd
- Glan Hafren, Sir Fynwy
- Bwcle, Sir y Fflint
- Pentref Cil-ffriw, Castell-nedd Port Talbot
- Llandudoch, Sir Benfro
- Sant-y-brid, Bro Morgannwg
- Gogledd Llanelli, Sir Gaerfyrddin
Bydd Llywodraeth Cymru hefyd yn canolbwyntio ar ymgysylltu â chymunedau er mwyn hyrwyddo gwerth y terfyn cyflymder newydd, gan gyflwyno’r achos y bydd lleihau cyflymder yn arwain at gymunedau mwy cydlynus a diogel.
