Mae disgwyl i gwmni awyrofod Airbus roi gwybod i weithwyr yn eu ffatri ym Mrychdyn yn Sir y Fflint a fydd eu hwythnos waith yn cael ei gwtogi.
Byddai gweithwyr yn debygol o golli 6.6% o’u cyflog petai nhw’n pleidleisio o blaid cwtogi eu horiau gwaith o 10%.
Daw hyn wedi i’r cwmni gyhoeddi llynedd eu bod yn bwriadu cael gwared a 1,435 o swyddi yno.
Er bod disgwyl i nifer o weithwyr dderbyn diswyddiadau gwirfoddol y gobaith yw y bydd lleihau oriau’r gweithlu yn osgoi diswyddiadau gorfodol.
Bydd 3,500 o aelodau undeb Unite yn pleidleisio fore dydd Llun, Chwefror 1, ac mae disgwyl y canlyniad erbyn y prynhawn.
Mae’r ffatri yn Sir y Fflint yn cyflogi tua 6,000 o bobol, ond yn sgil y pandemig cafodd 3,200 eu rhoi ar gynllun ffyrlo Llywodraeth San Steffan ers mis Ebrill y llynedd.
Petai’r gweithwyr yn cytuno i’r trefniant newydd fe fyddai yn dod i rym pan fyddai’r cynllun ffyrlo yn dod i ben ac yn parhau tan y Nadolig.
