Mae Andrew RT Davies wedi cyhoeddi pwy fydd yng nghabinet cysgodol y Ceidwadwyr Cymreig, ar ôl iddo gael ei benodi’n arweinydd.

Mae’n dweud bod y cabinet “wedi’i adeiladu ar seiliau cadarn profiad, talent a gweledigaeth”.

Y rhai sydd wedi’u henwi yw:

  • Mark Isherwood (Cyllid, Gogledd Cymru a Phrif Chwip)
  • Angela Burns (Iechyd a Gwasanaethau Cymdeithasol)
  • Russell George (Economi, Trafnidiaeth a Chanolbarth Cymru)
  • Suzy Davies (Addysg, Sgiliau a’r Gymraeg)
  • Janet Finch-Saunders (Yr Amgylchedd, Ynni a Materion Gwledig)
  • Laura Anne Jones (Tai a Llywodraeth Leol, Cydraddoldeb, Plant a Phobol Ifanc)
  • David Melding (Iechyd Meddwl, Lles, Diwylliant a Chwaraeon)

“Rydyn ni mewn eiliad sy’n wahanol i’r un eiliad arall, ac mae pandemig COVID-19 ond wedi taflu goleuni ar yr heriau ym mywydau bob dydd pobol; heriau sydd wedi’u gwneud yn fwy anodd gan ugain mlynedd o fethiannau Llywodraeth Lafur Cymru,” meddai’r arweinydd newydd.

“Ddylen ni ddim amau potensial ein gwlad.

“Mae Cymru’n llawn pobol uchelgeisiol a chymunedau sy’n ysu am y cyfle i lwyddo, ond mae llywodraethau Llafur olynol wedi ein dal ni’n ôl.

“Mae’r Ceidwadwyr Cymreig eisiau cael Cymru i symud a datgloi potensial ein gwlad a byddwn ni’n cyflwyno’r weledigaeth honno i’r bobol ar Fai 6.”