Mae Prif Weithredwr y Coleg Nyrsio Brenhinol wedi rhybuddio y gallai llacio cyfyngiadau coronafeirws dros y Nadolig arwain at “tswnami didostur” o achosion newydd.
Dywedodd y Fonesig Donna Kinnair y bydd “teithio ac ymweld â theulu… yn sicr o arwain at fwy o achosion, mwy o bwysau ar y Gwasanaeth Iechyd a mwy o farwolaethau”.
Mae pedair gwlad y Deyrnas Unedig wedi cytuno i barhau gyda llacio’r cyfyngiadau dros y Nadolig rhwng Rhagfyr 23-27.
Bydd y cyfyngiadau teithio yn cael eu llacio ar draws y pedair gwlad ac aelodau dwy aelwyd yn unig fydd yn cael dod ynghyd yng Nghymru i ffurfio swigen dros yr ŵyl.
Yn dilyn y Dolig mae Cymru yn wynebu clo mawr am gyfnod amhenodol, o Ragfyr 28 ymlaen.
Ac mae Gogledd Iwerddon hefyd wedi cyhoeddi y bydd chwe wythnos o gyfyngiadau llym yno o ddydd San Steffan ymlaen.
Mae Llywodraeth yr Alban hefyd wedi gwrthod diystyru’r posibilrwydd o gyflwyno cyfyngiadau.
Bydd 68% o boblogaeth Lloegr yn byw dan gyfyngiadau Haen 3 o ddydd Sadwrn, Rhagfyr 19, ymlaen.
‘Mwy o achosion, mwy o bwysau a mwy o farwolaethau’
Gydag wythnos i fynd tan y Nadolig, dywedodd y Fonesig Donna Kinnair, Prif Weithredwr y Coleg Nyrsio Brenhinol, y dylai gweinidogion roi cyngor “ffres a manylach”.
“Ar ôl blwyddyn anodd, greddf pawb yw bod eisiau bod gyda’i gilydd a gweld anwyliaid – yn enwedig y rhai sy’n byw ymhell ar wahân neu sy’n teimlo’n ynysig. Ond mae’r hyn sydd yn y fantol yn dod yn hollol eglur,” meddai.
“Bydd teithio ac ymweld â theulu ar yr adeg yma o’r flwyddyn yn sicr o arwain at fwy o achosion, mwy o bwysau ar y Gwasanaeth Iechyd a mwy o farwolaethau.
“Drwy droi’r ail a’r drydedd don yn tswnami didostur, byddem yn dechrau 2021 yn y ffordd waethaf bosibl.”
Ychwanegodd na fyddai nyrsys yn mwynhau’r Nadolig “gan wybod beth sy’n eu disgwyl ym mis Ionawr”.
