Mae Bwrdd Iechyd Prifysgol Betsi Cadwaladr wedi cyhoeddi y bydd Ysbyty Bryn Beryl, Pwllheli, yn cau dros dro oherwydd heriau staffio.
Bydd yr Uned yn cau o ddydd Sul (Rhagfyr 13) am dair wythnos.
Nid yw Bwrdd Iechyd Prifysgol Betsi Cadwaladr wedi datgelu os yw’r heriau staff wedi’u hachosi gan bandemig y coronaferiws.
Dywedodd Ffion Johnstone, Cyfarwyddwr Ardal y Gorllewin ar gyfer Bwrdd Iechyd Prifysgol Betsi Cadwaladr: “Rydym wedi penderfynu cau Uned Mân Anafiadau Ysbyty Bryn Beryl dros dro mewn ymateb i heriau staffio presennol.
“Bydd yr Uned yn cau dros dro o ddydd Sul 13 Rhagfyr am dair wythnos.
“Byddwn yn adolygu hyn yn gyson ac yn gobeithio gallu dychwelyd i oriau agor arferol o Ionawr 3, 2021.
“Hoffem ymddiheuro am unrhyw amhariad y gallai hyn ei achosi, ond ein blaenoriaeth yw gallu darparu gwasanaethau diogel ac effeithiol i gleifion a sicrhau lles ein saff ar yr un pryd.
“Mae hefyd yn hanfodol ein bod yn darparu gwasanaeth Mân Anafiadau â staff cymwys sy’n ddiogel i’n cleifion.
“Hoffem atgoffa’r gymuned leol bod Uned Mân Anafiadau Ysbyty Alltwen yn dal ar agor 24 awr y dydd, saith niwrnod yr wythnos.”
Cyhoeddwyd yn ddiweddar bod Bwrdd Iechyd Betsi Cadwaladr bellach allan o fesurau arbennig.
