Mae Cyngor Sir Ceredigion yn rhybuddio am gynnydd mewn achosion o’r coronafeirws yn ardaloedd Llanbedr Pont Steffan a Dyffryn Aeron.
Fe ddaw ddiwrnod yn unig ar ôl rhybudd tebyg am ardal Aberystwyth.
Yn ôl y Cyngor Sir, roedd 159.6 o achosion ym mhob 100,000 o’r boblogaeth yn y sir.
Fe fu 35 o achosion positif yn yr ardal dan sylw dros yr wythnos ddiwethaf, ac mae’r Cyngor Sir yn dweud bod pobol yn dod ynghyd yn gymdeithasol ac yn y gweithle wedi arwain at y cynnydd.
Maen nhw’n atgoffa pobol i barhau i ddilyn y cyfyngiadau, gan gynnwys cadw pellter oddi wrth ei gilydd, golchi dwylo’n rheolaidd a gwisgo mwgwd.
Maen nhw’n atgoffa pobol fod symptomau’r coronafeirws yn cynnwys:
- tymheredd uchel
- peswch cyson newydd
- colli’r gallu i arogli neu flasu
Maen nhw hefyd yn cynghori pobol i ddilyn y canllawiau canlynol:
- Cadw pellter o 2m oddi wrth eich gilydd pan fyddwch allan – dan do ac yn yr awyr agored;
- Golchi eich dwylo’n rheolaidd;
- Cyfyngu ar eich cyswllt cymdeithasol;
- Gweithio o gartref lle bynnag y bo’n bosibl.
- Gall aelwydydd ffurfio ‘swigen’ gyda’i gilydd – ni ellir cyfnewid, newid na hymestyn trefniant swigen ymhellach nag un aelwyd;
- Caniateir i bobl gyfarfod ag eraill tu allan i’r swigen honno mewn lleoliad rheoledig, fel tafarn neu fwyty lle mae protocolau diogelwch llym ar waith. Ond, pedwar person yw nifer y bobl sy’n gallu cyfarfod a hyd yn oed wedyn dylid cadw pellter cymdeithasol lle bynnag y bo modd.
- Gwisgo gorchudd wyneb mewn mannau cyhoeddus dan do, siopau ac ar drafnidiaeth gyhoeddus;
- Os oes gennych unrhyw symptomau COVID-19, waeth pa mor ysgafn, rhaid i chi hunan-ynysu gartref a threfnu prawf ar unwaith, gan adael eich cartref i gael prawf yn unig. Mae angen archebu prawf ar-lein https://llyw.cymru/gwneud-cais-i-gael-prawf-coronafeirws-covid-19 neu drwy ffonio 119.
