Mae Prif Swyddog Meddygol Cymru, Dr Frank Atherton, wedi ysgrifennu ar bobol fuodd yn cysgodi yn gynharach eleni er mwyn cynnig cyngor wrth i lefelau’r coronafeirws godi eto.
Yn y llythyr, mae Dr Frank Atherton yn darparu cymorth a chanllawiau ar y canlynol:
- Dewisiadau y gall pobol eu gwneud a’r camau i’w cymryd, i helpu i leihau risg.
- Brechlyn rhag y ffliw.
- Y cymorth sydd ar gael.
- Plant a chamau gwarchod.
- Mynd i’r gwaith a’r ysgol.
- Os bydd pobol yn datblygu symptomau’r coronafeirws.
- Byw o ddydd i ddydd.
- Gofalu am eu lles.
“Mae’r feirws hwn yn debygol o fod yn rhan o’n bywydau am beth amser eto”
“Rydym yn gwybod bod y camau gwarchod wedi helpu i wneud i rai pobl deimlo’n fwy diogel, ond i lawer o bobl eraill roedd yna anfanteision sylweddol i’r cyngor a roddwyd, yn enwedig teimlo’n unig ac ar wahân,” meddai’r llythyr.
“Gan ein bod yn deall effeithiau’r coronafeirws yn well nawr, rydym yn gwybod hefyd nad yw llawer o grwpiau o bobl sydd fwyaf tebygol o fod yn ddifrifol wael neu farw yn cael eu cynnwys yn y dull a gymerwyd gennym o’r blaen, a oedd yn seiliedig ar gyflyrau meddygol.
“Mae’r feirws hwn yn debygol o fod yn rhan o’n bywydau am beth amser eto ac felly rwyf am eich helpu i fyw’n ddiogel ochr yn ochr ag ef.
“Rwyf yn deall bod hwn yn gyfnod anodd a heriol iawn i chi a’ch teulu.
“Rwyf am eich helpu i ddeall y dewisiadau y gallwch eu gwneud i leihau eich risg eich hun a hefyd eich helpu i drafod â’ch teulu a’ch ffrindiau sut y gallan nhw eich cefnogi drwy ddilyn yr un cyngor.
“Nid dim ond i’r rhai a oedd yn gwarchod eu hunain o’r blaen y mae’r canllawiau hyn – gall pawb eu dilyn i leihau eu risg.”
