Mae pedwar person yn yr ysbyty yn dilyn damwain car ym Mwlchgwyn ym Mwrdeisdref Sirol Wrecsam neithiwr (Hydref 4).
Cadarnhaodd Heddlu’r Gogledd bod gwrthdrawiad wedi bod rhwng car Vauxhall Cavalier a Vauxhall Agila.
Cafodd y gwasanaethau brys eu galw am 7:14yh nos Sul, gyda phedwar ambiwlans yn ogystal â cherbyd ymateb brys a thri cherbyd tân yn mynychu’r gwrthdrawiad.
Cafodd tri pherson eu cludo i Ysbyty Maelor Wrecsam, tra bod un person wedi cael ei gludo i Ysbyty Brenhinol Prifysgol Stoke.
“Osgoi’r ardal”
Neithiwr (Hydref 4), gofynnodd yr heddlu wrth bobol i “osgoi’r ardal” gan rybuddio y byddai’r ffordd ynghau i’r ddau gyfeiriad.
“Bydd y B5430 ym Mwlchgwyn ynghau am gyfnod oherwydd gwrthdrawiad car,” meddai llefarydd ar ran Heddlu Gogledd Cymru.
