Bydd Rheilffordd Dyffryn Conwy, sy’n teithio o Flaenau Ffestiniog i Landudno, yn ail agor heddiw (Medi 28) weid misoedd o fod ynghau oherwydd llifogydd.
Achoswyd difrod sylweddol i’r cledrau yn ystod storm Ciara fis Chwefror.
Ers hynny, bysiau sydd wedi bod yn cludo teithwyr i fyny ac i lawr y dyffryn.
Mae Network Rail wedi buddsoddi £2.2m ar y gwaith atgyweirio gan osod 16,000 o dunelli o gerrig bob ochr i’r trac rhwng Tal y Cafn a Llanrwst i geisio atal llifogydd yno.
Yn ôl Network Rail mae’r cynllun hwnnw wedi gweithio.
Pan darodd Storm Francis yr ardal ddiwedd mis Awst ni ddifrodwyd y rheilffordd yn ystod y tywydd eithafol.
‘Cyswllt hanfodol’
“Mae llinell Dyffryn Conwy yn gyswllt hanfodol i lawer o gymunedau yng ngogledd Cymru, a bydd y buddsoddiad hwn yn gwella gwytnwch y rheilffordd hanfodol yma yn ystod tywydd eithafol”, meddai Chris Heaton-Harris, y Gweinidog Rheilffyrdd.
“Bydd uwchraddio’r amddiffynfeydd rheilffordd yn helpu i atal cau’r cledrau am gyfnod hir, osgoi gwasanaethau bysiau rhwystredig, a darparu amserlen fwy dibynadwy i bobol.”
Diolchodd Martyn Brennan, cyfarwyddwr Trafnidiaeth Cymru i gwsmeriaid am eu hamynedd yn ystod y misoedd diwethaf.
“Hoffwn ddiolch i gwsmeriaid am eu hamynedd a gofyn iddynt barhau i wirio gwasanaethau ar-lein. Byddwn yn parhau i ddarparu cysylltiadau trafnidiaeth gan ddefnyddio bysiau newydd”, meddai.
“Tra bod hyfforddiant gyrwyr hanfodol yn digwydd, bydd Network Rail hefyd yn gwneud gwaith cynnal a chadw ar y lein, fel ailosod y cledrau.”
