Mae Llys y Goron Abertawe wedi clywed i yrrwr sydd wedi ei chyhuddo o achosi marwolaeth cynghorydd o Geredigion drwy yrru yn beryglus iddi deimlo’n “ddideimlad” pan sylweddolodd beth oedd wedi digwydd.
Bu farw Paul James, 61, a oedd yn gynghorydd Plaid Cymru yn ward Llanbadarn Fawr ger Aberystwyth, mewn gwrthdrawiad gyda dau gar ar yr A487 ger Bow Street fis Ebrill y llynedd.
Mae Lowri Powell, 44, o Benrhyncoch a Christopher Jones, 40, o Bont ar Fynach, yn gwadu achosi marwolaeth trwy yrru’n beryglus.
“Es i’n ddideimlad,” meddai Lowri Powell.
“Bydd gyda mi, mae’n debyg, am weddill fy oes.
“Cefais fy nallu gan olau’r haul a oedd yn llachar iawn a thynnu fy fisor haul i lawr.”
Effaith golau’r haul
Mae’r ddau yrrwr yn dweud bod golau’r haul wedi effeithio ar yr hyn roedden nhw’n ei weld.
Mae Llys y Goron Abertawe eisoes wedi clywed gan ddau arbenigwr y gallai golau’r haul fod wedi effeithio ar allu gyrwyr i weld, ond mae un arbenigwr o’r farn byddai’r gyrwyr dal wedi gallu gweld Paul James oherwydd ei siaced lachar.
Clywodd y llys gyfweliad heddlu gan y gyrrwr arall, Christopher Jones.
Dywedodd Christopher Jones wrth yr heddlu ei fod yn gyrru rhwng 50 a 53 milltir yr awr pan gafodd ei ddallu gan olau’r haul.
Roedd yn gwisgo sbectol haul, ac roedd ganddo ei fisor haul i lawr hefyd.
“Dechreuais sgrechian ar fy ngwraig i ffonio ambiwlans,” meddai.
“Rydw i wedi ail-fyw’r digwyddiad drosodd a throsodd yn fy mhen filiynau o weithiau”.
Mae disgwyl iddo roi tystiolaeth ddydd Gwener (Medi 4).
Mae’r achos llys yn parhau.
