Mae’r Blaid Lafur yn dweud eu bod nhw’n gofidio bod rhai rhannau o wledydd Prydain, gan gynnwys Cymru, yn diodde’n fwy na’i gilydd wrth i swyddi ddiflannu o’r sector manwerthu.

Maen nhw’n rhybuddio y gallai hynny osod rhanbarthau a gwledydd yn erbyn ei gilydd.

Yn ôl ymchwil gan y blaid, mae ardaloedd sydd â chanran uchel o weithwyr awyrennau, manwerthu a gweithgynhyrchu yn debygol o weld mwy o swyddi’n cael eu colli na llefydd eraill.

Er bod disgwyl i ragor o swyddi gael eu colli yn ystod y dirwasgiad economaidd, dywed y Blaid Lafur nad oes digon o gefnogaeth wedi’i theilwra ar gyfer y gweithwyr.

Mae Cymru ymhlith y llefydd sydd â’r ganran uchaf o weithwyr manwerthu (10%), ynghyd â gogled-orllewin a gogledd-ddwyrain Lloegr.

Mae 12% o weithwyr yng Nghymru yn y sector gweithgynhyrchu.

Ymateb Llafur

“Mae gweinidogion yn wfftio rhannau o’r Deyrnas Unedig wrth i’r wlad fynd i ddirwasgiad, gyda ffigurau’n awgrymu y bydd rhai llefydd yn cael eu taro’n anghymesur o ran yr argyfwng swyddi,” medai Matthew Pennycook, llefarydd busnes y Blaid Lafur.

“Mae Llafur yn galw ar y Llywodraeth i wneud tro pedol ar y dull blanced niweidiol o ddiddymu’r cynllun ffyrlo, nad yw’n ystyried amgylchiadau’r gwahanol sectorau na’r effaith ar y cymunedau sydd â hanes balch yn y diwydiannau hyn.

“Mae angen i’r Llywodraeth wneud y peth iawn ar ran y cymunedau a busnesau hyn, a’u tywys nhw drwy’r argyfwng drwy dargedu cefnogaeth – nid tynnu’r cwch oddi tanyn nhw tra bo’r storm yn dal i ruo.”