Mae chwech o bobl wedi cael eu cludo i’r ysbyty ar ôl mynd i drafferthion yn y môr yn Aberdyfi yng Ngwynedd, meddai gwylwyr y glannau.
Cafodd bad achub yr RNLI eu galw ar ôl i wyth person gael eu dal yn y cerynt yn y dwr ger Aberdyfi ddydd Sul (Gorffennaf 26).
Yn ôl Gwylwyr y Glannau cafodd chwech o bobl eu cludo i’r ysbyty tra bod dau berson arall wedi cael triniaeth ar y safle.
Does dim manylion pellach am eu cyflwr ar hyn o bryd.
Mae’n debyg bod nifer o alwadau 999 wedi cael eu gwneud tua 2.15 ddydd Sul yn adrodd bod nifer o bobl “mewn trafferthion” yn y dŵr yn Aberdyfi.
Yn ôl Gwylwyr y Glannau cafodd tri pherson eu cludo i’r ysbyty yn eu hofrennydd, un mewn ambiwlans awyr a dau berson arall mewn ambiwlans.
Cafodd y chwech eu cludo i Ysbyty Bronglais yn Aberystwyth ac Ysbyty Gwynedd ym Mangor.
Roedd pob un o’r rhai oedd mewn trafferthion wedi cael eu tynnu o’r dŵr erbyn 4.40pm.
