Rhoi pwysau ar fudiad tai tros “swyddi Cymraeg”

Menna Machreth
Roedd tua chant o ymgyrchwyr iaith yn bresennol mewn protest yng Nghaernarfon heddiw mewn ymdrech i wrth-droi penderfyniad cymdeithas dai yng Ngwynedd i beidio cynnwys y Gymraeg fel sgil hanfodol ar gyfer swyddi rheoli haen uchel.

Mae Cartrefi Cymunedol Gwynedd wedi penderfynu gollwng gofynion iaith wrth hysbysebu swyddi allweddol.

Ymysg y siaradwyr yn y brotest heddiw yr oedd yr Aelod Seneddol Hywel Williams; cyn-lywydd Plaid Cymru, Dafydd Iwan; a’r ymgyrchydd a’r prifardd, Ieuan Wyn.

Yn siarad ar ôl y brotest, dywedodd Menna Machreth, Cadeirydd Rhanbarth Gwynedd-Môn Cymdeithas yr Iaith Gymraeg, sydd wedi cydlynu trefniadau’r brotest rhwng nifer o fudiadau:

“Mae canran uchel iawn o denantiaid y gymdeithas dai hon  yn siaradwyr Cymraeg. Mae penderfyniad y sefydliad felly yn warthus. A rhaid i ni ddangos ein hymroddiad i fynnu bod y Gymraeg yn sgil hanfodol yma yng Ngwynedd mewn swyddi fel hyn.

“Os caniateir i hyn ddigwydd, bydd  yn tanseilio ymdrechion i gryfhau’r iaith, nid yn unig yn yr ardal hon ond llefydd eraill yn ein gwlad sy’n edrych i ni am arweiniad.

“Mae’r Gymraeg yn sgil hanfodol nid yn unig yma yng Ngwynedd ond ar draws Cymru, ac mae’n hen bryd i bob un sefydliad, sylweddoli, a gweithredu ar hynny.”