Mae Cymdeithas y Cymod yn cynnal dwy brotest yn erbyn awyrennau di-beilot heddiw – yn Aberporth a Llanbedr ger Harlech.
Mae’r ymgyrchwyr heddwch wedi ymateb yn chwyrn i’r newyddion y bydd yr ‘adar angau’ – neu drones – yn cyrraedd hen faes awyr milwrol Llanbedr y flwyddyn nesa’.
Mae’r Gymdeithas yn dweud bod cwmni awyr Qinetiq a’r maes awyr yn bwriadu arbrofi gyda’r awyrennau gwylio ac ymosod sy’n cael eu gweithredu o bell.
“Defnyddio rhagor o ddaear Cymru i ymarfer lladd” yw hyn, meddai’r Gymdeithas mewn datganiad.
Gosod lluniau
Yn ystod y brotest, fe fydd lluniau o bobol sydd wedi cael eu lladd gan yr awyrennau di-beilot yn cael eu gosod ar ffens y maes awyr.
Mewn datganiad, dywedodd Anna Jane o Gymdeithas y Cymod: “Rydyn ni’n pryderu bod Cymru yn cael ei defnyddio fwy fwy fel maes ymarfer i ladd.
“Gydag Epynt, Y Fali, Aberporth a Llanbedr yn awr, bydd enw Cymru yn cael ei gysylltu efo’r lle y caiff y dechneg o ladd ei hymarfer yn ddwys,” meddai Anna Jane ar ran Cymdeithas y Cymd..
“Gyda phrotest yn digwydd yn Aberporth a Llanbedr, y bwriad yw datgan nad pawb o bobol Cymru sydd yn hapus efo hyn.
“O ddangos wynebau pobol sydd wedi’u lladd, y gobaith yw y bydd hyn yn dangos bygythiad adar angau. Dileu bywyd yw eu bwriad.”
Cefndir
Mae un o awyrennau di-beilot diweddara’r Weinyddiaeth Amddiffyn yn cael eu profi yn Aberporth.
Er mai awyrennau casglu gwybodaeth yw Watchkeeper hyd yn hyn, fe fyddai’n bosib eu harfogi a dyw’r Llywodraeth ddim wedi addo na allai hynny ddigwydd yn y dyfodol.
Elfen arall ddadleuol yw mai yn Israel y cafodd Watchkeeper ei datblygu ac mae Israel wedi bod yn arloesi gyda defnyddio’r dechnoleg yn erbyn Palestiniaid.
Cyfarfod cyhoeddus
Bydd cyfarfod cyhoeddus yn Harlech ddiwedd mis Tachwedd i lansio ymgyrch ffurfiol yn erbyn yr adar angau.
Fe fu protest gynharach yn Llanbedr eleni, pan gafodd sloganau yn erbyn awyrennau di-beilot eu paentio ar y llain hedfan.
