Gareth Wyn Jones
Mae dyn ac a gafwyd yn euog o lofruddio dyn arall o dan bont yng Nghaerdydd wedi cael ei garcharu am oes.
Ddoe, cafwyd Gareth Wyn Jones yn euog yn Llys y Goron Caerdydd o lofruddio David Alun Lewis, ac fe fydd yn rhaid iddo dreulio o leiaf 20 mlynedd dan glo.
Roedd Jones wedi’i ryddhau o’r carchar bum niwrnod yn unig cyn llofruddio’r dyn, ac fe fu’n brolio wrth ffrindiau ei fod e wedi lladd David Alun Lewis, oedd yn alcoholig.
Roedd Jones, sy’n gaeth i heroin, wedi treulio tair blynedd yn y carchar am drywanu ei gariad gyda fforc.
Dwyn arian
Cafodd David Lewis ei daro 80 o weithiau cyn cael ei dagu a’i adael â’i wyneb i lawr yn y dŵr yn afon Tâf.
Wedi iddo ddwyn £50 oddi ar y dyn fu farw, defnyddiodd Jones yr arian i dalu am gyffuriau cyn ceisio tynnu rhagor o arian allan o gyfrif banc David Lewis o Ystrad Mynach.
Roedd Jones wedi pledio’n euog i gyhuddiad o ddynladdiad ond roedd yn gwadu cyhuddiad o lofruddio ar sail ei gyflwr meddyliol. Roedd wedi honni ei fod yn clywed lleisiau ar y diwrnod y digwyddodd y llofruddiaeth.
Ond penderfynodd y rheithgor yn unfrydol ei fod yn euog o lofruddio.
Mae’n cael ei gadw mewn uned ddiogel yn ysbyty meddwl Ashworth yn Lerpwl.
‘Trasig’
Yn dilyn y ddedfryd heddiw, dywedodd y Ditectif Uwch Arolygydd Kath Pritchard o Heddlu’r De: “Roedd hwn yn ddigwyddiad arbennig o drasig a oedd wedi gadael pobol mewn sioc a thristwch ofnadwy.
“Roedd David yn oedolyn diniwed a fu farw mewn amgylchiadau nad oes modd eu dychmygu.
“Roedd ei deulu’n ei garu’n fawr iawn.
“Rydym yn wirioneddol ddiolchgar i bawb ddaeth aton ni gyda gwybodaeth i helpu gyda’r ymchwiliad a gobeithio bod y ddedfryd heddiw yn sicrhau aelodau’r cyhoedd, nid yn unig yng Nghaerdydd ond ledled De Cymru y bydd unrhyw un sy’n targedu diniweidrwydd pobol eraill yn mynd o flaen eu gwell.”
