Ymladd teirw yn Sbaen
Bydd Aelod Seneddol Ewropeaidd Plaid Cymru Jill Evans yn pleidleisio heddiw o blaid rhoi terfyn ar gymorthdaliadau i gefnogi ymladd teirw.
Mae’r cymhorthdal yn rhan o’r gyllideb ar gyfer y byd amaeth yn 2015.
Ar hyn o bryd, mae’r Undeb Ewropeaidd yn cynnig cyllid i ffermwyr sy’n magu teirw ar gyfer gornestau.
Byddai gwelliannau sydd wedi cael eu cynnig i’r gyllideb yn atal yr arfer o fridio teirw at bwrpas ymladd.
‘Arfer creulon’
Mewn datganiad, dywedodd Jill Evans: “Mae’n annerbyniol bod ffermwyr sydd yn magu teirw ar gyfer ymladd yn cael cymorthdaliadau gan yr UE.
“Mae hwn yn arfer creulon a diangen sydd yn achosi llawer o ddioddefaint i anifeiliaid, a hyn oll yn enw chwaraeon ac adloniant honedig.
“Ar adeg pan fod adnoddau’n brin, hoffwn weld ariannu amaethyddol yr UE yn cael ei ddefnyddio i gefnogi ffermwyr fel y sawl sydd yng Nghymru, sydd â gwir angen yr arian ac sydd yn ei haeddu.”
‘Lles anifeiliaid’
Ychwanegodd Jill Evans: “Rwyf wedi gwneud lles anifeiliaid yn flaenoriaeth uchel a byddaf yn parhau i wneud hynny.
“Cyflwynais ddeiseb i Lywydd newydd Comisiwn Ewrop, Jean-Claude Juncker, yn galw am gomisiynydd gyda chyfrifoldeb clir dros les anifeiliaid.
“Mae ymladd teirw yn amlwg yn mynd yn groes i Gonfensiwn Ewrop dros amddiffyn anifeiliaid sydd yn cael eu ffermio.
“O dderbyn hynny, mae’n hollol anghywir i ddefnyddio arian cyhoeddus i gefnogi ymladd teirw.”
