Cyhoeddi enw gyrrwr beic modur fu farw mewn damwain

Alwyn Pritchard
Mae Heddlu Gwent wedi cyhoeddi mai cyhoeddi enw’r gyrrwr beic modur 53 oed fu farw mewn damwain ffordd yn Nantyglo dros y penwythnos.

Roedd Alwyn Pritchard yn Swyddog Heddlu Cymunedol gyda Heddlu Gwent a bu’n gweithio i dîm plismona Brynbuga am chwe blynedd.

Digwyddodd y ddamwain ar yr A465 rhwng Gilwern a Llanfoist nos Sadwrn diwethaf, ac mae’r heddlu wedi arestio dyn 37 oed o ardal Brynmawr, ynghyd a dynes 34 oed o Gilwern ar amheuaeth o achosi marwolaeth trwy yrru’n beryglus.

‘Uchel iawn ei barch’

Mewn teyrnged i Alwyn Pritchard, dywedodd ei deulu:

“Roedd Alwyn yn ŵr, tad, taid, brawd ac ewythr caredig a ffyddlon, a oedd yn uchel iawn ei barch.

“Does dim geiriau i ddisgrifio faint yr oedd yn ei olygu i’w deulu a’i ffrindiau. Fe wnaeth o argraff ar bawb y bu iddo eu cyfarfod yn ystod ei fywyd, yn yr heddlu ac fel rhiant maeth.

Ychwanegodd y Prif Gwnstabl Jeff Farrar:

“Roedd Alwyn yn swyddog cymunedol ymroddgar, caredig a chydwybodol ac yn rhan bwysig iawn o’r tîm. Mae’n golled enfawr ac fe fydd yn cael ei fethu gan y llu, ei gyd-weithwyr a’r gymuned. Mae ein cydymdeimlad dwysaf gyda’r teulu.”

Gofynnir i unrhyw un sydd â gwybodaeth am y ddamwain i gysylltu â’r heddlu ar 101.