Mae disgwyl i’r Gweinidog Iechyd gyhoeddi cynlluniau i ddiwygio’r gwasanaeth ambiwlans yng Nghymru yn ddiweddarach heddiw.
Bydd cyhoeddiad Mark Drakeford yn dod yn dilyn problemau mawr i’r gwasanaeth yng Nghymru a phryder bod staff yn digalonni oherwydd hynny.
Bythefnos yn ôl roedd y ffigyrau diweddaraf wedi dangos bod Gwasanaeth Ambiwlans Cymru wedi methu cyrraedd eu targedau am y 12fed mis yn olynol.
Roedd y ffigyrau’n dangos mai dim ond 62.5% o ambiwlansys oedd wedi ateb y galwadau mwyaf argyfyngus o fewn 8 munud, tra bod y targed yn 65%.
Ym mis Ebrill cafodd adolygiad o’r gwasanaeth ei gyhoeddi oedd yn dweud bod angen newidiadau mawr yn y ffordd mae’n cael ei reoli.
Argymhellion
Yr Athro Siobhan McClelland, academydd iechyd, oedd yn cadeirio’r adolygiad ac roedd yn edrych ar strwythur, rheolaeth sefydliadol, ariannu a pherfformiad y gwasanaeth.
Ymysg yr argymhellion, roedd rhoi rhagor o hyfforddiant i barafeddygon fel eu bod yn gallu gwneud penderfyniadau ynglŷn â lles cleifion, ac ailwampio targedau perfformiad.
Roedd yr adroddiad hefyd yn cynnig tri gwahanol fodel am y modd mae’r gwasanaeth yn cael ei rheoli yn y dyfodol.
– Y cyntaf oedd rhedeg y gwasanaeth fel bwrdd iechyd ar wahân sy’n cael ei gyllido yn uniongyrchol gan Lywodraeth Cymru.
– Yr ail opsiwn oedd bod y gwasanaeth ambiwlans yn cael ei chomisiynu gan Fyrddau Iechyd ond gydag amcanion a gweithdrefnau cliriach.
– Byddai trydydd dewis yn gweld Byrddau Iechyd unigol yn gyfrifol am y gwasanaeth ambiwlans yn eu hardal a fyddai’n gweld ei ddiddymu fel gwasanaeth Cymru gyfan.
Mae disgwyl y cyhoeddiad gan Mark Drakeford y prynhawn ma.
