Mae gwenynwr o Gymru yn lansio gwisg cadw gwenyn ar gyfer merched, sydd “bron” yn saff o atal pigiadau.
Yn dilyn y galw gan wenynwyr benywaidd, mae gwenynwr a ffermwr o Gastell-nedd, Ian Roberts, wedi creu fersiwn benywaidd o’i wisg cadw gwenyn – sydd wedi’i anelu at wenynwyr a hobïwyr.
Datblygodd Ian Roberts y wisg Queen Bee yn dilyn galw gan nifer o wenynwyr benywaidd a oedd eisiau gwisg wedi’i theilwra’n well ar gyfer nodweddion y corff benywaidd.
“Mae yna dros 40,000 o wenynwyr cofrestredig ym Mhrydain, ac mae canran mawr ohonynt yn fenywod,” meddai Ian Roberts.
“Cefais sioc pan glywais nad oedd gwisg cadw gwenyn penodol i ferched ar gael.
“Felly, yn ogystal ag archwilio’r farchnad, dechreuais ymchwilio i feintiau dillad menywod cyn gwneud ychydig o ddyluniadau cychwynnol.”
