Bydd yr arfer o werthu compost mawn yn dod i ben yng Nghymru yn dilyn ymgynghoriad ar y mater.
Mae’r cyhoeddiad gan Ysgrifennydd Materion Gwledig Cymru yn dilyn ymgynghoriad cyhoeddus sy’n dangos bod 92% o ymatebwyr Cymru’n cefnogi gwaharddiad cyffredin ar werthu mawn ar gyfer garddio.
Er nad oes echdynnu mawn yng Nghymru ar hyn o bryd, bydd y cyhoeddiad heddiw (dydd Llun, Rhagfyr 5) yn amddiffyn mawnogydd Cymru yn y dyfodol.
Mawndiroedd yw’r storfeydd carbon mwyaf yn y Deyrnas Unedig, ac maen nhw’n cefnogi sawl cynefin a rhywogaeth, ynghyd â dal llawer iawn o ddŵr.
Pan fydd mawn yn cael ei echdynnu, mae’r carbon sy’n cael ei storio y tu mewn i’r gors yn cael ei ryddhau fel carbon deuocsid, gan gyfrannu at newid hinsawdd.
‘Gwahaniaeth gwirioneddol’
Yn ôl Llywodraeth Cymru, bydd y gwaharddiad yn dod ag allyriadau nwyon tŷ gwydr i ben o echdynnu a defnyddio mawn yn ddomestig a bydd yn allweddol wrth gyrraedd eu targedau Sero Net.
“Mae ein mawnogydd yn eiconig, ac fe fydd y cyhoeddiad heddiw yn allweddol yn y gwaith o’u diogelu a’u hadfer ar gyfer cenedlaethau’r dyfodol ac yn cefnogi gwaith Rhaglen Weithredu Genedlaethol Mawnogydd,” meddai Lesley Griffiths, Ysgrifennydd Materion Gwledig Cymru.
“Mae allyriadau carbon deuocsid o echdynnu mawn yn cael effaith ar newid hinsawdd a bydd cyflwyno gwaharddiad ar fanwerthu mawn er mwyn garddwriaeth yn gwneud gwahaniaeth gwirioneddol.
“Dangosodd yr ymgynghoriad gefnogaeth gref i wahardd gwerthu mawn yng Nghymru a byddwn nawr yn gweithio i weithredu gwaharddiad cyn gynted ag y bydd hynny’n ymarferol bosib.”
