Mae’r Gweinidog Addysg wedi dweud ei bod yn cydweithio gyda llywodraethau’r Alban a Gogledd Iwerddon i weld a yw’n bosibl ailymuno â chynllun Erasmus.
Cyhoeddodd Boris Johnson y penderfyniad i beidio cymryd rhan bellach wrth i Brydain adael yr Undeb Ewropeaidd.
Un o rheini oedd yn gyfrifol am ddatblygu’r cynllun yn y 1970au a’r 1980au oedd y Cymro, Dr Hywel Ceri Jones.
Bu Prydain yn rhan o gynllun Erasmus ers 1987 gan roi’r hawl i fyfyrwyr astudio mewn prifysgolion ledled Ewrop.
“Mae’n hynod, hynod o siomedig bod Llywodraeth y DU wedi dewis peidio â bod yn rhan o Erasmus+,” meddai Kirsty Williams yn ystod cynhadledd i’r wasg brynhawn dydd Llun, Ionawr 18.
Disodli gan gynllun ‘gwael iawn’
Mae disgwyl i gynllun tebyg ar raddfa fyd-eang, yn dwyn enw Alan Turing, ddisodli’r cynllun cyfnewid tramor.
“Rwy’n gwybod bod y Cynllun Turing sy’n disodli Erasmus+ yn un gwael iawn,” meddai’r Gweinidog Addysg.
“Bydd myfyrwyr yng Nghymru, myfyrwyr addysg uwch, myfyrwyr ysgol, a’r bobl ifanc hynny a gafodd y cyfle i fanteisio ar Erasmus+ drwy sefydliadau ieuenctid, mewn sefyllfa waeth am beidio cael mynediad llawn i Erasmus+.
“Rydym yn gweithio gyda chydweithwyr yn yr Alban a Gogledd Iwerddon i weld a allwn gadw’n haelodaeth o Erasmus+.
“Rydym yn edrych i wella Cynllun Turing, bore ’ma er enghrhaifft bûm yn cyfarfod a gweinidogion ar draws y Deyrnas Unedig i fynd i’r afael â’r bwlch yn y ddarpariaeth gwasanaethau ieuenctid nad yw’n cael sylw gan y cynllun Turing.
“Byddaf yn archwilio pob opsiwn posibl, er mwyn sicrhau nad yw pobl ifanc Cymru’n colli allan o ganlyniad i’r penderfyniad hwn – nad oedd yn rhaid i Lywodraeth y Deyrnas Unedig ei wneud.”
