Mae mudiad Dyfodol i’r Iaith wedi canmol adroddiad pum mlynedd Comisiynydd y Gymraeg, a’i sylwadau fod angen mwy o athrawon cyfrwng Cymraeg os am wireddu’r nod o greu miliwn o siaradwyr.
Fe ddywedon nhw bod y ddogfen yn “gynhwysfawr a threiddgar”, ac yn “hoelio’r heriau sy’n wynebu’r iaith ar hyn o bryd a thua’r dyfodol.”
Wrth gyhoeddi’r adroddiad ddydd Iau (Hydref 21), fe nododd Aled Roberts, Comisiynydd y Gymraeg, nad oes yna ddigon o athrawon sy’n siarad Cymraeg ar hyn o bryd.
Roedd hefyd yn pwysleisio nad yw’r iaith wedi bod yn ystyriaeth ganolog yng nghynlluniau adfer Covid-19, a rhybuddiodd y gallai hynny gael effaith andwyol hirdymor ar ddyfodol y Gymraeg.
Bwriad yr adroddiad oedd cyflwyno darlun o sefyllfa’r iaith a phrofiadau siaradwyr Cymraeg, ac amlinellu datblygiadau arwyddocaol y pum mlynedd ddiwethaf.
Ymateb Dyfodol i’r Iaith
Mae Heini Gruffudd, Cadeirydd Dyfodol i’r Iaith, yn groesawgar o’r adroddiad, sy’n tynnu sylw at y prinder mewn athrawon Cymraeg eu hiaith.
“Mae neges gadarn y Comisiynydd yn gwbl addas ac amserol, wrth i Gymru a’r Gymraeg barhau i ymdopi ag effeithiau Covid,” meddai.
“Mae’r adroddiad yn amlygu ac ategu ein hunion bryderon ninnau drwy osod y Gymraeg yn ei chyd-destun cymdeithasol ac economaidd ehangaf a gosod pwyslais cadarn ar ei defnydd.
“Mynnwn fod y Llywodraeth yn cymryd y ddogfen hon o ddifrif a gweithredu ar fyrder yn unol â’i hargymhellion.
“Cytunwn fod ehangu addysg cyfrwng Gymraeg yn hanfodol i dwf y Gymraeg, a da yw nodi fod y Comisiynydd yn galw am fynd i’r afael â’r diffyg athrawon sy’n gymwys i addysgu drwy’r Gymraeg.
“Heb hynny, ni cheir unrhyw fath o sail i wireddu uchelgais strategaeth y Llywodraeth.
“Rydym yn ddiolchgar iawn i’r Comisiynydd am wynebu ac amlinellu sefyllfa’r Gymraeg yn ei holl gymhlethdod.”
