Heddlu’r Met yn lansio adolygiad yn dilyn llofruddiaeth Sarah Everard

Bydd Heddlu’r Met yn lansio adolygiad yn dilyn llofruddiaeth Sarah Everard gan yr heddwas, Wayne Couzens.

Fe fyddan nhw hefyd yn cyflogi swyddog ymgynghori er mwyn arwain yr adolygiad, a bydd dyletswyddau’r unigolyn hynny’n cynnwys monitro diwylliant mewnol y llu.

Roedd Cressida Dick, Comisiynydd Heddlu’r Met, wedi dod o dan bwysau i ymddiswyddo ar ôl i Couzens dderbyn dedfryd o fywyd yn y carchar wythnos diwethaf, gan godi cwestiynau ynglŷn â safonau’r heddlu.

Ysgrifennodd hi yn yr Evening Standard, y byddai’r swyddog newydd yn ffigwr blaenllaw yn yr heddlu, ac yn gweithio ochr yn ochr â hi ar ddelio â llygredd o fewn y sefydliad.

Safonau

“O fewn wythnos rwy’n gobeithio cyhoeddi y bydd ffigwr blaenllaw yn cael ei benodi i arwain adolygiad o’n safonau proffesiynol a’n diwylliant mewnol,” meddai Cressida Dick.

“Byddan nhw’n edrych ar ein hyfforddiant, arweinyddiaeth, prosesau, systemau a safonau ymddygiad, ac yn archwilio achosion lle mae swyddogion wedi gadael y cyhoedd i lawr.

“Bydd y person hwn hefyd yn gweithio ochr yn ochr â fi, gan herio fy uwch dîm a’n harweiniad ar safonau, llygredd, camymddwyn rhywiol a sut mae’r Met yn ymateb pan aiff pethau o chwith.”