“It’s Clan-Goth-Len” medd fideo’n hysbysebu Bragdy Llangollen

Mae fideo gan Fragdy Llangollen wedi corddi’r dyfroedd ar ôl awgrymu mai ‘Clan-Goth-Len’ yw’r ffordd i ynganu Llangollen.

Mae’r fideo’n ymddangos ar dudalen Facebook y cwmni.

Mae’n dechrau gydag unigolyn yn cerdded i mewn i’r dafarn ac yn gofyn am “pint of Langolen”, a dyn yn chwarae pŵl yn baglu dros y ciw wrth glywed yr ynganiad anghywir.

Mae’r fideo’n mynd yn ei blaen wrth i griw’r dafarn ganu “If you want a pint of… It’s Llangollen” gan ynganu enw’r lle yn gywir wrth restru holl gyrfau’r bragdy, ond mae’r capsiwn ar y sgrîn yn dweud “It’s Clan-Goth-Len”.

Ymateb

Mae llond dwrn o bobol wedi ymateb i’r fideo, gan feirniadu’r bragdy.

Daw’r feirniadaeth yn fuan ar ôl i ddeiseb i warchod enwau Cymraeg ddenu miloedd o lofnodion.

“Mae’n iawn, bydda i’n archebu o fragdy Cymreig go iawn nid yr un yma,” meddai un person wrth ymateb.

“Mae digon o fragdai Cymreig eraill i archebu ganddyn nhw,” medd un arall.

Er hynny, mae un person lleol yn amdiffyn y bragdy, gan ddweud y byddai “llawer yn deallt y jôc”.

“Mae genai ofn bod yr ymateb yn glir beth sydd yn anghywir gyda agwedd pobl Cymraeg. Fel Cymraes!!” meddai Susie Jones wrth wneud sylw ar y neges.

“Hollol siomedig yn fy nghyd-Gymry a’u tuedd anffodus ac anallu amlwg i dynnu ynghyd i gael cynnyrch lleol Cymreig ar y map.

“Teimlo braidd yn siomedig!!!

“Fel person o Llangollen dwi’n gweld yr hwyl yn hyn ac yn gwybod fydd yna llawer yn deallt y jôc.”

Mae golwg360 wedi gofyn am ymateb gan y bragdy.