Heddlu’n apelio yn dilyn ymosodiad ar ddyn 74 oed yn Rhisga

Mae Heddlu Gwent yn apelio am wybodaeth yn dilyn ymosodiad ar ddyn 74 oed yn Rhisga nos Wener (Medi 25).

Fe ddigwyddodd am oddeutu 7.45 rhwng bwyty Indiaidd Tamarind a garej Texaco.

Roedd y dyn yn gyrru Vauxhall Zafira glas ac yn canu ei gorn ar gerddwr gwrywaidd ger y garej.

Taflodd y cerddwr botel at y car cyn neidio ar y cerbyd a tharo’r gyrrwr yn ei wyneb drwy’r ffenest.

Bu’n rhaid i’r gyrrwr dderbyn triniaeth yn yr ysbyty.

Mae’r heddlu’n awyddus i siarad â’r cerddwr.

Dylai unrhyw un â gwybodaeth ffonio’r heddlu ar 101.

Tân mewn garej ac unedau diwydiannol yn Abertawe

Mae 75 o bobol wedi cael eu symud o’u cartrefi yn dilyn tân mawr mewn garej ac unedau diwydiannol yn Abertawe.

Cafodd y gwasanaethau brys eu galw i ardal Pentrechwyth am 10.30 neithiwr (nos Sadwrn, Medi 26).

Cafodd sawl busnes a chartref eu heffeithio, ond chafodd neb ei anafu.

Mae safle un o fusnesau’r ardal wedi’i ddinistrio’n llwyr, a chollodd nifer fawr o gartrefi eu cyflenwadau trydan am gyfnod.

Mae ymchwiliad ar y gweill ac mae Heol Pentrechwyth ynghau am y tro.