Pen dyrys Page bron ar ben

Mae’r erthygl hon am ddim i bawb gael blas ar gynnwys y cylchgrawn. Beth am danysgrifio er mwyn darllen rhagor o’r cylchgrawn?

Gyda Rob Page ar fin cyhoeddi carfan Cymru ar gyfer Cwpan y Byd, Gwilym Dwyfor sy’n ceisio proffwydo pwy fydd ar yr awyren i Qatar…

Bydd y cyhoeddiad yn digwydd heddiw (dydd Mercher, Tachwedd 9), yn addas iawn ym Mhendyrus. Yn addas gan y bydd y dewis wedi bod yn rhoi pen dyrys i Rob Page ers rhai misoedd bellach, a hefyd gan mai yn y pentref hwnnw yn y Rhondda y magwyd y rheolwr cenedlaethol.

Fe wna’ i weld eisiau’r pendroni. Mae’r trafod ar Twitter a’r negeseuon di ben draw ar WhatsApp am ffitrwydd Joe Allen neu ffaeleddau honedig Joe Morrell yn gymaint rhan o’r cyffro a’r paratoi â chasglu sticeri neu drefnu ffleits.

Ond y gwir amdani wrth gwrs yw nad yw Page yn gwyro gormod oddi wrth yr hyn mae’n ei adnabod. Mae’n dueddol o aros yn driw i’r hogia’ â’n cafodd ni yma yn y lle cyntaf… felly er cymaint o hwyl ydi sôn am gysylltiadau teuluol Paul Mullin, mae’n annhebygol y bydd blaenwr Wrecsam, na’i nain, wedi hyd yn oed croesi meddwl tîm hyfforddi Cymru.

Man da i gychwyn bob tro felly yw’r garfan ddiwethaf. Roedd 27 o chwaraewr yn rhan o’r camp hwnnw yn y diwedd, yn dilyn y diweddariadau carfan arferol. Ond, roedd pedwar pwysig iawn yn absennol hefyd, gydag anafiadau yn cadw Ben Davies, Joe Allen, Aaron Ramsey a Harry Wilson allan ym mis Medi.

Mae tri ohonynt yn aelodau o’n un ar ddeg cryfaf a’r llall ddim yn bell iawn y tu ôl iddynt, felly fe ddaw’r pedwar yma yn ôl i mewn os ydynt yn ffit. A’r os mwyaf ar hyn o bryd yw’r un sy’n loetran o gwmpas Allen. Nid yw Pirlo’r Preseli wedi chwarae ers iddo anafu llinyn y gâr ganol mis Medi, ond mae o mor bwysig i Gymru, fe wnaiff Page ei gynnwys os oes unrhyw siawns y gallai fod yn barod ar gyfer rhai o’r gemau. Pe bai chi’n dweud wrtha’i fod gan Joe 10% o gyfle i fod yn ffit erbyn y ffeinal, fe fyddwn i’n mynd â fo!

Os yw fy syms i’n iawn, golyga hynny fod Page angen chwynnu pum chwaraewr o’r garfan ddiwethaf. Mae anaf creulon i Rhys Norrington-Davies wedi gwneud un o’r penderfyniadau drosto. Roedd amddiffynnwr Sheffield United yn cael tymor gwych ac yn sicr o’i le ar yr awyren cyn iddo gael ei gario oddi ar y cae yn erbyn Coventry bythefnos yn ôl.

O ran y pedwar arall, rhaid edrych yn gyntaf ar y rhai na chafodd eu defnyddio o gwbl yn y ddwy gêm ddiwethaf yn erbyn Gwlad Belg a Gwlad Pwyl. Chris Gunter oedd un ond fe fydd o ar yr awyren, heb os. Mae carfan fach, ond swnllyd, o gefnogwyr Cymru sydd ddim yn hoffi hynny ond mae profiad yr amddiffynnwr a’i ddylanwad yn y garfan yn amhrisiadwy. Mae yna dueddiad o ddweud yr un peth am Jonny Williams ond rydw i’n gyndyn o gynnwys Joniesta yn yr un gwynt â Gunts. Fysa gen i ddim problem gweld Williams yn cael ei adael allan, ond dw i ddim yn gweld hynny’n digwydd.

Dau sydd yn fwy tebygol o aros adref yw’r bechgyn ifanc yn eu harddegau, Jordan James a Luke Harris. Cafodd y ddau flas cyntaf o garfan y tîm cyntaf chwe wythnos yn ôl ond go brin y bydd lle iddynt y tro hwn.

Gadawa hynny Wes Burns, Mark Harris a Rabbi Matondo a dim ond un sedd ar ôl ar yr awyren. Nid yw Matondo wedi gwneud digon mae arnaf ofn felly mae hi rhwng y ddau arall. Mae Harris yn chwarae’n gymharol reolaidd i Gaerdydd ac fe sgoriodd o gôl wych yn erbyn Blackburn ychydig wythnosau yn ôl. Ond dw i’n amau efallai y bydd hyblygrwydd Burns i chwarae mewn amrywiol safleoedd yn rhoi’r fantais iddo ef, yn enwedig oherwydd anaf Norrington-Davies.

Mae’n dibynnu os yw Page yn dewis ôl-asgellwr neu amddiffynnwr canol i gymryd lle Norrington-Davies mewn gwirionedd. Burns fyddai’r dewis naturiol fel ôl-asgellwr ond gall yr anaf agor cil y drws i rywun fel James Lawrence hefyd, amddiffynnwr canol troed chwith sydd yn chwarae’n rheolaidd i Nürnberg y tymor hwn.

Nid wyf wedi sôn o gwbl am y gôl-geidwaid eto ac mae’n debyg y bydd un newid bach yn y safle hwnnw hefyd. Tom King oedd y trydydd dewis y tu ôl i Wayne Hennessey a Danny Ward fis Medi, ond gydag Adam Davies yn holliach eto, rwyf yn disgwyl ei weld o’n dychwelyd. Ail ddewis yw Davies i Sheffield United ond cafodd rediad byr yn y tîm yn ddiweddar oherwydd gwaharddiad i’r dewis cyntaf, Wes Foderingham. Amseru da, diolch ’ti Wes!

A dyna ni felly, hawdd… Neu a fydd yna syrpréis bach? Fe awgrymodd Page yn ddiweddar ei fod yn cadw llygad ar ambell chwaraewr sydd yn chwarae’n dda yn y Bencampwriaeth. Gallai fod yn cyfeirio at Ryan Hedges ond nid oedd o yn nhîm Blackburn y penwythnos diwethaf oherwydd anaf. Mae blaenwr Millwall, Tom Bradshaw, wedi bod ymhlith y goliau’n ddiweddar hefyd ond er cymaint yr hoffwn i weld un o feibion Gwynedd yn y garfan, dw i ddim yn rhagweld hynny’n digwydd.

Mwy tebygol o lawer fyddai gweld chwaraewr Abertawe, Oli Cooper, yn sleifio i mewn i’r garfan, a hynny ar draul Tyler Roberts neu Rubin Colwill siŵr o fod. Un enw arall mae’n rhaid i daflu yn y pair yw David Brooks. Mae’n annhebygol wrth gwrs wedi cyfnod cyhyd allan ond peidiwch â synnu gweld Page yn rhoi pob cyfle i chwaraewr Bournemouth brofi ei ffitrwydd, gydag enw arall wrth gefn rhag ofn.