Ar drothwy’r Gemau Paralympaidd sy’n dechrau yn Paris fory (dydd Mercher, Awst 28), mae Olivia Breen wedi’i henwi’n gyd-gapten tîm Prydain.
Bydd yr athletwraig o Gymru’n rhannu’r cyfrifoldeb gyda Dan Pembroke.
Caiff y capteniaid eu dewis gan eu cyd-athletwyr ar ffurf pleidlais.
Dyma bedwerydd Gemau Paralympaidd yr athletwraig sy’n rhedeg ac yn gwneud y naid hir.
Mae hi wedi cystadlu ym mhob Gemau ers Llundain yn 2012, lle enillodd hi ei medal gyntaf.
Enillodd hi’r fedal efydd yn y naid hir yn Tokyo yn 2020.
‘Anrhydedd enfawr’
Dywed Olivia Breen ei bod hi’n “anrhydedd enfawr” cael ei henwi’n gapten Prydain.
“Ro’n i fatha, ‘Waw, mae hyn yn anhygoel’,” meddai.
“Dw i’n falch iawn o fod yn un o gapteniaid y tîm ochr yn ochr â Dan, ac allwn ni ddim aros i weld sut mae’r tîm yn perfformio.
“Dw i wedi cyffroi’n fawr o gael bod yn gapten.
“Roeddwn i eisiau cyfleu [yn ei haraith] y gall y tîm ddod ata’ i ag unrhyw gwestiynau.
“Dyma fy mhedwerydd Gemau Paralympaidd, felly mae gen i lawer o brofiad.
“Alla i ddim aros i fynd allan i gystadlu nawr.
“Dw i mewn lle da iawn yn feddyliol ac yn gorfforol, felly dw i wedi cyffroi’n fawr.”
